Бауыржан Әбдішев қысымға шыдамай Серік Ахметовке жала жапқанын айтты
Әбдішев Ахметовке жала жапқанын мойындады. Қарағанды облысының бұрынғы әкімі мұны қысымға шыдамай жасадым деп отыр. Сондықтан бүгін ол судьядан тергеу кезінде берген жауаптарының күшін жоюды сұрады. Бауыржан Әбдішевтің айтуынша, тергеушілер оны шақырып алып экс-премьер Серік Ахметовке қарсы бірнеше эпизод бойынша жала жабуды талап еткен. Әйтпесе, өзіңнің жағдайың мүшкіл болады депті.
Автор: Ербол Сейілхан
28.07.2015
Серік Ахметов те өзіне қатысты қозғалған қылмыстық істі мүлдем тоқтатуды сұрап отыр. Өйткені, тағылған айыптарда қылмыс құрамы жоқ деп есептейді екен өзі. Сонымен қатар, экс-премьер мемлекетке келтірілген шығын көлемін 1 миллиард теңгеден азайтуды өтінді. Осы қыруар қаржының тең жартысын, яғни 430 миллион теңгені экс-премьердің ағасы - «Сталь-Цинк» компаниясының басшысы Берік Ахметов бюджетке қайтарып берген болатын. Сондықтан адвокаттар осы жеке мекемеге қатысты эпизодты доғаруды талап етті. Бүгін судья Исламхан Есенбаевқа, атышулы іс бойынша өтіп жатқан 21 күдіктінің 50 адвокаты өтінішті үйіп тастады. Күдіктілердің бірсыпырасы айыпты алып тастауды, ал Қарағандының бұрынғы әкімі Бауыржан Әбдішев изолятордан тағы үйқамаққа ауыстырды сұраған. Бірақ судья мұның бірде бірін қанағаттандырған жоқ. Экс-премьердің өзі кешегідей емес, бүгінгі мәлімдемесіне қатысты жақ ашпады.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
