Украина президенті Астанаға жету үшін алыс болса да Ресейді айналып ұшуға мәжбүр. Киев пен Мәскеу арасында әуе қатынасының мүлдем  тоқтауына байланысты Порошенко мінген борт Қара теңіздің үстімен Грузия, Әзірбайжан арқылы Астанаға кеше түнделетіп келді. Ал ресми сапары бүгін басталған Украина президенті Ақордаға жұбайы Маринаны да ертіп келген.

Ресеймен арадағы қырғи-қабақ соғысқа қарамастан Украина қазаққа жау емес. Сондықтан Порошенко мен Назарбаевтың арасындағы жеке кездесу протокол белгілеген 40 минуттан 2 есе асып кетті. Ағынан жарылған  Украина президенті Назарбаевтың арағайындық танытып, қарулы қақтығысты тоқтатуға күш салғаны үшін алғыс айтса, Елбасы Минск келісімінің орындала бастауын жақсылыққа балады.

Нұрсұлтан Назарбаев, Қазақстан Республикасының Президенті:

-Минск уағдаластығы жалпы алғанда, орындалып жатқаны бізді қанағаттандырады. Әсіресе, кейінгі Норманд төрттігінің кездесуі үлкен үміт отын жақты.Украина үшін осындай күрделі кезеңде біз гуманитарлық көмек көрсетуді жалғастыратын боламыз. Донецкіге де, Луганскіге де. Қазақстан Украинаның оңтүстік-Шығысындағы халыққа азық-түлік жіберіп келеді. Оны да жалғастырады. 

Келіссөздер нәтижесін бүгін Назарбаев таза қазақ тілінде баяндады.  Сөз әріптесіне тигенде, Елбасы украинша түсінетінін, бірақ сәл ұмытып қалғанын айтқаны сол еді, Порошенко іліп әкетті.

-Мен украинша түсінемін. Сәл ұмытып қалғаным болмаса.

-Нұрсұлтан Әбішұлы, қазір еске түсіресіз...

Осыдан соң  Порошенко Астана төрінде отырып Кремльді тағы сынады.

Петр Порошенко, Украина Президенті:

-Ортақ көршіміз Ресей Қырымды аннексиялап, Донбассты басып алды. Соның кесірінен 8 мың бейбіт тұрғын қаза тапты. Қазір соғыс уақытша тоқтады. Екі аптадан бері оқ атылған жоқ. Әрі қарай да тыныштық бұзылмасына сенеміз.

Соғыстың кесірінен экономикасы әлсіреген Украина қазақтың энергоресурсына зәру. Әсіресе, Донбастағы шахталар бүлікшілердің қолына өткелі, отыннан қатты тапшылық көріп отыр. Сондықтан Қазақстан Украинаға Екібастұздың көмірін беруге келісті, шикі мұнайды да жеткізуге даяр. Бірақ құбыр Ресей аумағымен өтетіндіктен Кремльмен өзара келісу керек екен. Еуразиялық Одақтан көрі, Еуропалық одақты жөн көретін ресми Киев санкцияларға байланысты Қазақстанмен алыс-берістің кемігенін мойындап отыр. Олқылықтың орнын толтыру үшін президенттер арнайы келісімге қол қойды.

Астанадағы келіссөздерге көңілі марқайған Порошенко  алғысын қазақ тілінде айтты.

-Нұрсұлтан Әбішұлы, «спасибо» қазақша қалай айтылады?

-Рахмет.  

Бір ауыз сөз болса да, Ақордадан қазақша үйреніп шыққан  Порошенко Қазақстанмен космос тіпті мәдени саладағы байланысты арттыруды қалайтынын мәлімдеді. Президенттер сондай-ақ, қос елдің ұлы ақындары  Шевченкоға Астанадан, ал Киевтен Абайға еңселі ескерткіш орнатуға келісті. Қазақ хандығының 550 жылдығымен құттықтап қазақ-украин қатынасын құрмет тұтатынын  айтқан Порошенко түнде Ресейді айналып Каспий арқылы еліне ұшып кетеді. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!