Жолға тасталған тауықтың ішек-қарнынан шыққан иіс тұрғындарды тұншықтырды
Қолқаны қапқан қалдық. Құс фабрикасынан шығарылған қоқыс бүгін Боралдай кентінің тұрғындарын тұншықтырды.
Автор: Диас Нұрақын
25.02.2016
Тауықтың ішек-қарны мен қауырсынын тиеген көлік қалдықты дәл жол ортасына шашып тастаған. Салдарынан айнала ақ мамыққа оранып, аңқаны ашытатын ащы иіс аумақты алып кетті. Бұл қалдықтар жергілікті құс фабрикасынан шығарылған екен. Басшылығының айтуынша, жүргізуші көліктің артқы жақтауын жабуды ұмытып кетіп, қалдықтар көше бойына шашылыпты. Бірақ оны фабрика қызметкерлері білмеген. Жүргізуші де ауылды аймандай қылғанын ешкімге айтпады дейді. Сондықтан түс ауғанша тазаланбаған құс қалдықтары желмен жан-жаққа шашылып, жағымсыз иіс жайлап кеткен.
Төлеген Қарсақбай, құс фабрикасының экологы:
- Бүгін таңертең сағат сегізде бір машина шыққан. Сол бортты дұрыстап жаппаған. Байқамаған енді кішкене түсіп кеткен мусор. Бізге акиматтан сигнал түсті бірден машиналарды адамдарды жинап қазір тазалап жатырмыз. Екі сағатта бәрін тазалап тастаймыз.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
