Аудан әкімінің қолынан мектепке керек-жарағын алып жатқан Анар  отбасымен биыл көктемде Қытайдан көшіп келіпті. Өткен оқу жылының төртінші тоқсанын аудан орталығында тәмамдаған. Биылдан бастап ауылда оқитын болды.   

Анар Екпін, 3 сынып оқушысы:

-Мен Қытайда жақсы оқығанмын. Енді бұл жақта жақсы оқимын деген үміттемін. Мектеп ашылғаны да жақсы болды.

Бірлік орта мектебі бала санының аздығына байланысты 3 жыл бұрын жабылған еді. Енді теріскейге Қытай мен Талдықорғаннан көшкен он отбасындағы бес бала оның қайта ашылуына сеп болып отыр. Қоныс аударғандардың кейбіріне білім ошағынан жұмыс та табылыпты.

Әлен Оразалы, Бірлік ауылының тұрғыны:

-Осы мектепке мені жұмысқа орналастырғалы жатыр. Және де пенсияға  шыққанша жасым елуге келді, шамам жеткенше осы Бірлік ауылындағы мектепте бір кісілік есе қосып берсем деген мақсат.

Бірлік мектебіндегі бес балаға сабақ беретін екі мұғалімнің бірі осы мектептің түлегі. Бір кездері оқушыға толы сыныптар бүгінде елес болып қалды дейді ол.

Гүлдана Ахметова , мұғалім:

-11 жылдық мектеп болатын біз оқып кеткен кезде. Бұның алдында мұғалім мен оқушылар саны көп еді. Қазір екеу. Мен және тағы сол қазақ тілі мен әдебиетінен беретін мұғалім. Екі мұғалім.

Ең шағын мектеп ғимаратын жөндеуге үш жарым миллион теңге жұмсалған екен. Оның сыртында бір жарым миллионның қазандығы бар. Ал екі мұғалім мен бес балаға от жағушы, еден жуушы, күзетші мен мейірбикені қосқанда 8 адам қызмет көрсетпек. Жергілікті билік келер жылы бала саны көбейеді деп отыр. Өйткені оңтүстіктен осы ауылға тағы он шақты отбасы көшіп келеді деп күтілуде.  

Бізді Youtubе-та қараңыз! Бізді Facebook-та, Instagram-да, Telegram-да оқыңыз!