50 жыл өмірін автоспортқа арнап, әлемдік деңгейдегі барлық автожарыстарда жеңіп шықан Жан Тодт бүгінде халықаралық көлік федерациясын басқарады. Қазір федерацияға мүше елдердегі автоспорттың дамуы мен жол қауіпсіздігін жетілдіруге атсалысып жүр. Қазақстанға екінші рет келген Тодт мырза Алматының көлік қозғалысы туралы былай деді.

Жан Тодт, Халықаралық автокөлік федерациясының президенті:

-Алматыдағы көлік қозғалысы тура Францияның осыдан 40 жыл бұрынғы кейпіне ұқсайды. Мұнда жол қауіпсіздігінің жетілдіретін тұстары баршылық. Бірақ қала басшылығының жол қауіпсіздігімен қатар, автоспортты да дамытуға деген ынтасы қуантады.

Бұл ретте қала билігі алдымен автобустардың қалыпты жүруіне жағдай жасап, арнайы жол салып жатқаны белгілі. Былтыр Абай даңғылынан басталған бұл үрдіс биыл да бірқатар көшелерде жалғасып жатыр. Қазіргі уақытта Желтоқсан мен Наурызбай көшелерінің бір шетіне жеңіл көліктерді жүргізбейтін тыйым белгілері салынуда.

Румиль Тауфиков, Алматы қаласы әкімінің орынбасары:

-Бұл көшелерде автобустар көп жүре бастайды. Қазірдің өзінде жүру аралығы бірқалыпқа түсіп келеді. Бұрын екі жағы көліктерге болып тұратын. Енді ол кедергіден құтылатын боламыз.

Сондай-ақ, осыдан екі ай бұрын Байбек өзі барып ашқан ақылы автотұрақ жүйесі де қала аумағын түгел қамти бермек. Қала басшыларының ойынша, соның арқасында көлігін қаңтарып, автобусқа отыратындар қатары көбеймек.

Қырық жыл бұрынғы Францияның кебін киген Алматының көшелерін ретке келтіру үшін әзірге қала басшылығының ойлап тапқаны ақылы автотұрақтар мен арнайы автобус жолдары. Шілде айында Райымбек даңғылында қоғамдық көлік жолы сызылып бітсе, бүгінде Желтоқсан және Наурызбай батыр көшелеріне салынып жатыр. Соның арқасында 59 автобус бағыты оңтайландырылып, оның ішінде жетеуі мүлде алынып тасталған. Ал алдағы қараша айына дейін Төле би көшесіне арнайы автобус жолы жүргізілмек. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!