Әбдібеков жұмысшыларына ақша төлеудің орнына Головкиннің боксын көруге кеткен кәсіпкерлерді жазаламақ
Қарағанды облысының әкімі жұмысшыларына жалақы төлемейтін мекеме басшыларының баспанасын су мен жарықтан ажыратуды ұсынды. Өйткені олар жұрттың маңдай тер ақысын қалтасына басып, бала -шағасы немесе көңілдестерімен шетелдерде дамалады екен.
Автор: Саят Сабдалы
19.09.2016
Нұрмұхамбет Әбдібеков мұндай ақпаратты қайдан алғанын ашып айтпады. Десе де, жұмысшылары жеуге нан таба алмай отырғанда отбасымен шетел асатындар Қарағанды облысында жетерлік екен. Әбдібеков тіпті Еуропаға барып Головкиннің кездесуінде бөркін аспанға атып жүргендерін де көріпті. Сондықтан дүйсенбінің таңында қарамағаныдағыларды жинаған облыс басшысы шенеуніктерге тың идея айтты. Онысы өзіне де ұнаса керек. Енді соны қалай да іске асыруды тапсырды.
Нұрмұхамбет Әбдібеков, Қарағанды облысының әкімі:
-Ойланыңыздар, заңгерлермен ақылдасыңыздар. Мен айтқандай жұмысшының коммуналдық қарызын жұмыс берушіге аударуды қарастырыңыздар. Сосын су мен жарығын қиып тастайық. Бірақ жарықты дизелді генератормен қосып алады. Суын өшіріп тастайық онда? Қысқасы, бірдеңе ойлап табыңдар.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
