Атышулы «Коллекторлық қызмет туралы» заң жобасын бес ай бұрын  қарауға алған депутаттардың арыны қатты. Ұзақ толғанған төменгі палата даулы құжатқа мынадай өзгеріс енгізіпті: соғыс ардагері, мүгедек тер, зейнеткерлер мен төсек тартып ауырып жатқан науқас немесе сотталғандар алған несиесін төлей алмай жатса, банк бұл топтағы азаматтардың берешегін кешіруі тиіс. Яғни, коллекторлар оларға күні-түні қоңырау шалып, қорқытып, үйін торуылдап мазалай алмайды.

Олег Смоляков, Ұлттық банк төрағасының орынбасары:

-Біз заң жобасына енгізген ұсынысты қолдаймыз. Шынында да банк несие берер кезде түрлі өмірлік жағдайларды ескермейді. Сондықтан мүгедек, науқас, зейнеткер сынды азаматтардың қарызын кешірген дұрыс. Бәрібір олардан ақшаны қайтаруға мүмкіндік аз.

Содай-ақ, қызметте жүріп оққа ұшқан әскерилердің, полицейлер мен табиғи апаттан қаза тапқан азаматтардың да берешегі жойылады. Қоғамдық ұйым өкілдері бұл тізімге көпбалалы аналарды қосу керек дейді. Бірақ егер мұндай мүмкіндігі шектеулі азаматтардың қарызды қайтармауына заңмен рұқсат етілсе, банктер оларға несие беруді тоқтатуы да ықтимал. Сондықтан пысықайлар жеңілдігі бар адамдардың атынан жаппай несие алуға көшуі мүмкін.

-Біздің менталитетімізді назарда ұстау керек. Кейбір бизнесмендер мүлкін мүгедектердің атына жазып қояды. Сөйтіп салық төлеуден қашады.

Сонымен қатар, халық қалаулылары коллекторлар кәмелеттік жасқа толмаған баласы бар үйлерге де жуымасын деп отыр.

Зағипа Балиева, Мәжіліс депутаты:

-Банктер әке-шешесіне, ата-анасына несие берсе, бар шараларды қолдансын, бірақ коллекторлық ұйымға бермеу керек. Сотқа берсе, сотқа берсін. Басқаша жолмен шешсін. Бірақ үйге келіп, телефон соғып, зіркілдеп,дүркілдеп баланың мазасын алуға жол беруге болмайды. Осындай ұсыныс айттым.

Балиева балаларға коллекторлардың қоқан-лоқысын көрсетпеу үшін  соңына дейін күреспек. Қазір елімізде миллионнан астам адам несиесін төлей алмай жүр екен. Көбі той жасауға, көлік, үй сатып алу үшін қарыз алған. Ал олармен 200-ден астам коллекторлық компания жұмыс істеп жатыр.

Бірақ депуттаттар коллекторлық қызмет туралы заңды қабылдамай, агенттіктердің жұмысын тоқтатуы да мүмкін. Өйткені Ұлттық банк әзірлеген құжатқа сай, коллектор қарызды толық қайтарса, банк ақшаның тең жартысын соларға береді. Мәжілісмендер сол соманы коллекторға төлемей, несие алғандарға 50 пайыз жеңілдік жасауды ұсынбақ. Алайда, бұған қарсылық танытқан банктер ендігі жерде несиені мұндай жеңілдігі бар азаматтарға мүлдем ұстатпауы да ғажап емес.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!