Алматы облысында қар барысы көбейіп келеді
Алматы облысындағы ұлттық табиғи бақта мекен ететін қар барысының саны көбейіп келеді. Мамандар қазір олардың 40-қа жеткенін айтып, сүйінші сұрап отыр. Биік шыңдарда тіршілік ететін жануарды кезіктіру қиын. Сондықтан қар барысын тек арнайы бақылау қондырғылары арқылы түсіріп алыпты.
Автор: Жаңалық Ахаш
25.10.2016
Қар басқан шыңдар мен қияларды мекендейтін барысты үнемі бақылап отыру мүмкін емес. Қызыл кітапқа енген бұл жануарды қадағалау үшін мамандар Таянь-Шань тауларының солтүстік-шығыс беткейіне 12 арнайы техникалық тұзақ құрыпты. Сол арқылы бейнетаспаға түсіріп отырады.
Төрегелді Мырқасымов, «Көлсай көлі» ұлттық бағының қызметкері:
- 16 рет түсірілген қар барысы. Қайыңды, Қыдұрғы сайы мен Шелектің басынан түсіріп алдық.
Қар барысының саны қырыққа жеткен. Оны жануарларды қорғаумен айналысатын халықаралық қорлар да растайды. Дегенмен, ұлттық бақтың басшылары оларды сақтап қалу мәселесіне алаңдап отыр. Өйткені таудағы өзен сулары жылдан жылға тартылып барады екен. Егер бөгет орнатпаса жануарлармен қоса сол маңдағы ауылдарға да қауіп төнеді.
Әміржан Малыбеков, «Көлсай көлі» ұлттық бағының директоры:
-Тоспа қоймаса жер астындағы сулар сіңіп, жер астына жоғалып бара жатыр. Аңдар ғана үшін емес адамдар үшін де қауіпті. Төменгі жағындағы жолдарды алып кетуі, ауылдарды алып кетуі мүмкін.
Көлсай көлдерінің тартылуы үлкен апатқа әкелетінін айтып мамандар түрлі құзырлы мекемелерге арызданған. Жағдаймен танысуға депутаттар тобы да келіпті. Бірақ әзірге қандай да бір шешім шығармаған көрінеді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
