Биылғы қытымыр қыс жұртты әуреге салып отыр. Қардың қалың түскені өз алдына, апта бойы азынаған боран да жығылғанға жұдырық болды. Қазір мұнда ұйтқыған желден жиналған ақ ұлпаның биіктігі 4 метрге жетіп жығылады. Соның кесірінен, 20-ға жуық түтіннің қора-қопсылары түгелдей көміліп қалған.

-Дәл мына апанның ауызы тәрізді үңгірді жұрт үйлеріне кіру үшін қазып қойған. Енді олар баспаналарына күнделікті осы арқылы еңбектеп кіріп, еңбектеп шығуға мәжбүр. Себебі, бүтіндей бір көшені, қар басып қалғандықтан, ауладағы ақ ұлпаны шығаратын орын таппай дал.

Тіпті, ұзындығы 1 шақырым болатын көшені аршуға ауылдық әкімдіктің шамасы жетпеген. Көмек сұрап барғандарға, ондағылар қолдарында қаражат жоқ деп, қу шөппен ауыз сүртеді екен.

Алмагүл Толымқожина, Приречный ауылының тұрғыны:

-Үкіметтен ақша бөлінбеді деп айтуға болмайды. Өйткені, есеп бергенде, қар шығардық деп жатады. Ал оның жатысы мынау. Олардың қай жерден шығарып жүргендерін білмейміз.

Әкімдіктегілер қар астынан шыққан жанайқайды естіп отырмыз деп ақталды. Айтуларынша, көміліп қалған тұрғындарға қол ұшын созу үшін қомақты қаржыны да тауып қойған.

Алғатай Байдомалақов, Приречный ауылдық аймағының әкімі:

-Октябрьская көшесіне ақша бөлінді. 1 млн. 145 мың теңге. Бұл ақшаны конкурсқа қоямын. Одан кейін ол көшені тазалаймыз.

Әкім бұл конкурс бір жұманың ішінде өткізілетінін айтты. Сол жеңімпаз көшедегі үйілген қарды толық тазалауға міндеттелмек. Ал, құрғақ уәдені үйіп төгетін ауылдық биліктің сөзіне тұрғындар сенбей отыр. Олар, іс сиырқұйымшақтанып кетсе, көктемде су астында қаламыз ба деп те алаңдаулы.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!