Талма дертімен ауыратын жалғызбасты ана Перизат осы пәтері үшін 3 жыл кезекте тұрыпты. Қаңтар айында бірі мүгедек, бірі мектеп жасына жетпеген үш баласымен бір бөлмелі пәтерге ие болған. Алайда үйге кіргеннен-ақ қуанышы су сепкендей басылды. Себебі, іші алқам-салқам пәтердің қабырғаларына сол кездің өзінде жарық пайда болған.

Перизат Орынбет, Қоғам ауылының тұрғыны:

-Жарық үлкейіп жатыр.Қолмен ұстасаң құлап кететіндей боп тұрады.

Бұл үйлер 5 айдан аса уақыт бұрын пайдалануға берілген. 18 пәтерлік 10 үйді тапсыру үшін тіпті облыс әкімі арнайы келген болатын. Бүгінде сол үйлердің екеуі мынандай күйде. Қабырғадағы саңылаудан екінші ғимарат көрінеді. Қыс бойы бүрсеңдеп шыққан жұрт еш қарекет қылмады деп шенеуніктерге өкпелі. Әкімдіктегілер расымен, қабырға қақырап тұрғанын білсе де, апатты деуге асықпаймыз деп жайбарақат отыр.

Мұрат Есінбек, Отырар аудандық сәулет және құрылыс бөлімінің басшысы:

-Құлап кетпеуге оның арасында сыммен қаланды. Құлап кететін болса сол кезден бері құлап кететін еді. Оның астындағы жаңағы топырақ дұрыс тығыздалмаған ба, сондай себептер бар. 

Проблеманы білсе де, Құдай сақтасынмен жүрген басшылар құрылыс жобасында болмаған пандусқа дейін салып беретін болды. Бар күшін салуға уәде еткен атқамінерлер мамырдың соңына дейін мәселені шешіп тастамақ. 

Жұрт айлап шақыра алмаған шенеуніктер жұмысты бірер күнде бастаймыз деп отыр. Ол үшін әуелі жергілікті әкімдік пен мердігер компаниядан құрылған комиссия мұндағы олқылықты өз көзімен тағы бір көруі керек. Содан кейін ғана қираудың аз-ақ алдында тұрған үйлермен қатар тіпті аулаға дейін қанттай қыламыз деп уәде береді. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!