Рахат ауылындағы мына мектепті тұрғындар ұзақ күткен. Нысанның құрылысы біткенде, әсіресе, оқушылар қатты қуаныпты. Бірақ алғашқы қоңырауға сақадай сай тұрған білім ордасының қызығын бұлар көрмейін деп тұр. Себебі, 15 күннен бері уақытты созып келген мектеп директоры бүгін оларды қуып шыққан.

Нұрия Байжанова, Рахат ауылының тұрғыны:

- Күнде ертең кел дейді. Шаршатты. Бүгін соңғы күні еді.

Алайда ашулы топ бұған көнбек емес. Онсыз да жылдар бойы оқушылар ауыл асып білім алған. Ал енді үйдің қасында су жаңа мектеп бола тұра, баламызды басқа жерге бермейміз дейді ата-аналар.

- Қажетті құрал-жабдықтың барлығымен қамтылған кабинетке оқушылар бүгін ғана кірді. Әзірге олар осының барлығын қызықтап, су жаңа парталарда отыр. Ал, ертеңнен бастап мұнда жаңа мектепке қабылданған басқа балалар келіп жайғасады.

Соңына дейін үміт үзбеген оқушылар осыны естігенде бірінен соң бірі жылап жіберді. Тұрғындар мұнда бармақ басты, көз қыстыға жол берілгеніне сенімді. Айтуларынша, жаңа мектепке өзге аумақтың балалары көптеп қабылданыпты.

Ділдара Қазақбаева, Рахат ауылының тұрғыны:

- Қаланың тұрғындары өтіп алған, ауысып алған. Сосын өзімізге орын болмайды. Мұғалімдерімен қосып ауысқан, мұғалімдердің балалары тағы бар.

Бірақ шенеуніктер мұны жоққа шығарды. Ал оқушылардың обалына қалған нәрсе – о баста дұрыс құрылмаған жоспар екен. Себебі, 3 жарым мыңдай оқушысы бар ауылға салынған мектеп бар-жоғы 600 орындық.

Бәтес Аманова, Еңбекшіқазақ ауданы білім бөлімінің басшысы:

- 3 мың баланы бұл мектепке сыйдыра алмаймыз. Ол мүмкін емес. Сол ретпен өзінің оқыған мектебінде оқиды.

Соған қарағанда, балалардың тағы өзге мектепке қатынап оқуына тура келмек. Ал мәселенің бір ғана шешімі бар. Ол – тағы да жаңа мектеп салу. Бірақ оның қашан бой көтеретіні белгісіз.  

Бізді Youtubе-та қараңыз! Бізді Facebook-та, Instagram-да, Telegram-да оқыңыз!