Алматы облысында ұстаздар мектепті базарға айналдырған директордың қызметтен кетуін талап етті
Маскүнем директор, дипломсыз ұстаздар! Осылай деп ашынған Алматы облысы Байғазы ауылының тұрғындары мектепті базарға айналдырған басшыны қызметінен қуа алмай жүр. Айтуларынша, жаңа директор келген екі жылда 15 мұғалім жұмыстан кеткен. Білім деңгейі төмендеп, мектеп аудан бойынша ең соңғы орынға түсіпті. Ал, осының бәрін қалыпқа келтіруі тиіс басшы дипломы жоқ адамдарды жұмысқа алып, көшеде балалардың көзінше ішімдік ішуден арыға бара алмай жатқан көрінеді. Бұл былықтан облыстық білім басқармасы да хабардар. Бірақ, олар ескерту жасаумен ғана шектеледі екен.
21.09.2017
Жаңа оқу жылы басталғалы Алматы облысындағы Байғазы ауылының тұрғындарынан маза кеткен. Оларды ашындыратын мектептегі жағдай. Ата-аналар дипломсыз ұстаздардың балаларына сабақ беруіне наразы. Мектеп директоры жоғары білімі жоқ бірнеше адамды жұмысқа алып, оқушылардың санасын улауға жол берген.
Мұсабай Мұстафаев, Байғазы ауылының тұрғыны:
-Дипломы жоқ колледждің анықтамасымен мына жерге мұғалімдерді алып алған. Балаларда білім жоқ. Білім деген нөл. Аудан бойынша ең соңғы орында тұрған біздің мектеп. Мұғалім дұрыс болмаса білім қайдан болады.
Осыдан үш жыл бұрын ғана пайдануға берілген су жаңа мектепте 120 бала оқиды. Білім деңгейі бойынша көш соңында қалып кеткен бұл мекеменің тәрбие жұмыстарына да ата-аналардың көңілі толмай отыр. Дипломсыз ұстаздарды айтпағанда директордың өзі оқушыларға қол көтереді дейді олар. 15 жастағы ұлын ұрғаны үшін Бақытжан Тұяқов мектеп басшысы Нұрдаулет Омаровты сотқа да беріпті.
Бақытжан Тұяқов, Байғазы ауылының тұрғыны:
-Линейкада былай басынан ұрған ғой. Сонда құлап қалған. Үйге келсем жатыр. Басым ауырып жатыр дейді. Үлкен ұлымды жібердім мектепке не болғанын біліп кел деп. Сөйтсем директор ұрған дейді. Полицияға бердім. Прокуратураға жіберді. Жабылып қалды ғой әйтеуір.
Байғазылықтар білім ордасын базарға айналдырған басшының жұмыстан кетуін талап етіп отыр. Олар директор оқушылардың көзінше ішімдік ішіп, көшеде жүруден де тайынбайды дейді. Тіпті көктемде мас күйінде рөлге отырып, адам қаққан екен. Бірақ бұл жолы да іс сотқа жетпей жабылған. Олқылықтың барын дирактордың өзі де мойындап отыр.
Нұрдәулет Омаров, Байғазы орта мектебінің директоры:
-Мен осында бастық болғалы 2 жыл. Екі жылда 15 мұғалім ауысты. Себебі жас мамандар сырттан келеді да жағдай жоқ деп кетеді. Үйленіп кетеді. Солардың орнын толтыру үшін осы ауылдан сырттай оқып жатқан 3-4 мұғалімді алдым. Соның ішінде сырттай пед колледже, сырттай университетте оқып жатқандар бар. Бірақ қолдарында нақты дипломдары жоқ.
Ата-аналардың шағымынан кейін дипломсыз екі мұғалім жұмыстан қуылды. Ал үш студент сабақ беруді жалғастыра бермек. Аудандық білім бөлімі директорды да орнында қалдырыпты. Бірақ бұл шешіммен байғазылықтар келіспейді. Олар енді облыстық білім басқармасы мен министрлікке арызданбақ
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
