Оралдық оқушылар тегін тартылуы тиіс дәптерді ала алмай жылап жүр
Жаңа оқу жылымен қабаттасып келетін оқулық дауы әлі бітер емес! Бюджеттен миллиардтап ақша бөлінсе де, ақтаулық оқушылар тегін таратылуы тиіс жазу дәптерін әлі ала алмай жүр. Яғни, екінші сыныпқа қазақ тілі кітабымен қоса берілуі тиіс 4 бірдей оқу құралы мүлдем таратылмаған. Ал, оны сатып алу ата-ананың қалтасына ауыр тиейін деп тұр. Өйткені, сөздігі бар, бәрін қосқанда 10 мыңға жуық қаржыны қажет етеді. Ал, білім басқармасындағылар оқушылар қарапайым дәптер қолдана берсін деуден әрі аспады.
28.09.2017
Қолжетімсіз болып жатқан осы дәптерлер. 2 сыныпқа арналған мұндай оқу құралдары негізі қазақ тілі кітабымен қоса тегін таратылуы керек. Ал, бұларға оқулығы берілгенімен, дәптерін бірде-бірі көрмеген.
Виктория Леоненко, Ақтау қаласының тұрғыны:
- Біз Қазақстанның түкпір-түкпіріне хабарласып білдік. Мұндай жазу дәптері бәріне тегін таратылған. Орал, Өскемен, Астанада тапшылық атымен жоқ. Ақтауға бөлінген ақша қай қалтада кеткен сонда?!
Десе де, мектепке жетпеген дәптер дүкен сөрелерінде толып тұр. Тек оны сатып алуға кез-келгеннің жағдайы жетпейді. Өйткені, жазу дәптерінің өзі 7 мың теңге тұрады. Әрі олмен бірге берілуі тиіс сөздік те оқушыларға таратылмаған. Ондай орысша-қазақша сөздіктің өзін 2 жарым мың теңгеге сатып алу қажет. Сонда, бір сыныпта 30 оқушы барын ескерсек, балалардың бәрін тегін таратылмаған оқу құралымен қамтамасыз ету үшін 285 мың теңге кетеді.
Бірақ, ата-аналар мұндай шығыннан түбегейлі бас тартып отыр. Олар Үкімет бірінші кезекте қазақ тілін үйренуге жағдай жасаса дейді. Өйткені, балалары тұрмақ, өздері де мемлекеттік тілді үйренуге құлшынып тұр.
Нұрсұлу Епесова, Ақтау қаласының тұрғыны:
- Немереммен бірге орыс балалар оқиды. Олардың өздері де, ата-аналары да қазақ тілін үйренгісі келеді. Осы тілде сөйлеп, жазуды армандайды. Бірақ, мектептің өзінде оған мүмкіндік бермей отыр.
Ал, мектеп басшылығы мен білім басқармасындағылар бүгін мәселенің оңай шешімін тауыпты-мыс. Өзге оқушылардың бәрі жаңа дәптерге жазып жүргенде, бұлар қарапайым дәптермен отыра берсін дейді жауаптылар. Өздері соған рұқсат бергендеріне мәз. Ал, қазақ тілі дәптерінің тапшылығына оқушы санының аяқасты көбеюі себеп көрінеді.
Гүлмира Мамаева, Маңғыстау облысы білім басқармасы басшысының орынбасары:
- Жыл сайын біздің облысымызда бала саны артуда. Орта есеппен 5,6,7 мыңға артуда. Биылғы бөлінген қаражаттың шегінде оқулықтар сатып алынды. Өз жұмыстарын кәдімгі жәй дәптерге жазуға рұқсат етіледі.
Осылайша, айналып келгенде ата-аналар өз қотырын өзі қасуға мәжбүр болды. Сөйтіп, баласының біліміне алаңдаған олар, әр сыныпқа бір-бір дәптерден сатып алып, қалғандарына соның көшірмесін жасайтын болып тарқасты.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
