Ақ олимпиадаға ақ көңілдерімен алып-ұшып барған отандастарымыздың көңілі әуежайда су сепкендей басылды. Бірі демалыс алып, екіншілері жұмыстан сұранып, 4 жылда бір өтетін шараның куәгері болсақ, Қазақстан құрамасына қолдау көрсетсек деп алыстан ат терлетіп жеткен екен. Бірақ, Инчхон әуежайында әлек басталған. Жүзге жуық отандасымыздың қолында құжаты, тапсырыс берген қонақ үйлері туралы барлық мәлімет болғанмен кедендегілер өткізбейміз деп шешіпті. Нақты себебін түсіндірмеген.

Ақшалары шығын болып, не ары, не бері өте алмай жатқан отандастарымыз әуежайдағы «қапастан» қалай құтыларын білмей шыр-пыр. Кейбірінің, тіпті паспорттарын тартып алған.

-200 доллардан, 150 доллардан алған. Менде виза бар Жапонияға. Менен паспорт алып қойды. Шыға алмай жатырмын. 3 күннен бері жертөледе жатырмыз. Тамақтары қымбат.

Кәрістердің қабақтары қату. Ағалаған, құжаттарын көрсетіп жағалаған қазақтарды тыңдауға құлық танытпайтындай. Редакцияға жолданған видеоларға қарағанда, тіптен аудармашыларды бермеген. Қазір Сыртқы Істер министрлігі осы жағдай бойынша анықтау шараларына кірісіп кетті.

Әнуар Жайнақов, ҚР СІМ ресми өкілі:

-Кореяға кіре алмаған Қазақстан азаматтарын шекарада паспорттық бақылау өткен кезде олимпиадаға жалған билеттерін көрсетіп, бара жатқан мақсаттарын дәлелдемеген. Оңтүстік Кореяның консулдық қызметінің мәліметіне сүйенсек, кіруден бас тартудың басты себептері шекарадан өтуден анық емес ақпаратты ұсыну. Мәлімделген ақпараттың нақты деректермен сәйкес келмеуі. Қолма қол ақшаның жетіспеушілігі мен қаирсы алушы адамның болмауы болып табылады.

Осы жағдай сыртқа шығатындарға сабақ болды. Сыртқы істер министрлігі Кореяға барам дейтін азаматтарға нұсқаулықтармен танысуға кеңес береді. Оңтүстік Кореядағы отандық дипломаттар әуежайдағы жанкүйерлердің жағдайын бақылауда ұстаймыз дейді. Бірақ, олардың олипимпиаданы көру үшін ары өтетіне, я елге кері қайтатыны әзірге белгісіз. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!