«Алматыда қонақта болғаныммен, бүгін сіздер менде қонақтасыздар. Бүгін мен шаттық сыйлағым келеді, қысылмай шаттаныңыздар, бұл менің көңілімді жадыратады», – деді Юлдуз Усманова.    

Жастардан көрі жасы келгендердің сүйікті әншісі Юлдуз Усманованың концерті Алматыдағы Республика сарайын лық толтырды. Өзбек әншісі шығармашылық кешін «Дедімай-ау» – қазақтың халық әнімен бастады.

«Қазақстанға келгенде өзімді өзбек сезінбеймін. Қараңызшы, түрім қазаққа ұқсайды. Мен қазақтай ойлай білемін. Сіздердің жан-дүниелеріңізді сезіне білемін. Бақытты болсақ та, бақытсыз болсақ та, көрші екенімізді ұмытпайық. Біз әрдайым бірге боламыз. Мінез-құлқымыз, діліміз бір. Ешкім қорланбасын, ешкімнің намысы тапталмасын. Сол үшін ән шырқаймын. Адами қасиетімізді жоғалтпайық, адамгершілік адамның қасиеті, оны алла бағалайды», – деді Юлдуз.

Усманованың қарияларға деген құрметі ерекше екен. Екі-үш әнін сахнада орындап, содан кейін залда отырғандарды аралап кеткен әнші бешпет киіп отырған әжейлерге еңкейіп, бар ықыласымен құшақтады.

«Әнімді жазған кезде халқымды ойлап отырамын. Көз алдымда қара халық тұрады. Құдайым-ай, бір алла бізді жаратты, бүкіл періштені алдымызға келтірді, бірақ адамдар неге әр түрлі? Өркөкіректік қайдан келді? Бір-бірімізге неге қатігезбіз? Бірақ ешқашан кеш емес, түзелейік! Жүрегімізге иман ұялатайық».

«Ең бастысы – адагершілік. Мен дүниеге келген Ферғана алқабында бесіктегі сәбимен Сіз деп сөйлеседі. Әр нәрестені құрметті қонақ деп қабылдайды. Бір-бірімізді құрметтей білейік».

«Кейбір ән авторынан кетіп, халыққа сіңеді. Халық әніне айналады. Бүгін мен сол әндерімді орындаймын. Халық қабылдаған әндерімді ұсынамын. Бұл мен үшін өте маңызды».

«Менің тыңдарманым – есейген тыңдарман. Мен де сіздермен бірге есейдім. Тыңдаушым маған опасыздық жасамайды. Ең құнды дүнием – тыңдарманым».

«Әндерімді көбінесе әйелдер тыңдайды. Аналар. Әлемде әдемі әйелдер қандай көп! Ал барлық әйел бақытты ма? Құрметті ер-азаматтар! Егер сіз табыс тауып, отбасын асырап, әйеліңізге сыйлық жасап тұрсаңыз, ол – керемет. Дегенмен біз үшін бақыт деген бөлек. Үйге шаршап жеткенде алдымыздан жымия қарсы алып, маңдайымыздан сүйіп тұрып: «Қатын, жақсы бол, әрқашан» десеңіз, ол біз үшін – махаббат. Әр әйелге махаббат тілеймін. Әйел махаббатын».

«Әр әртіс тар жолда тайғақ кешеді. Мен алланың әр бергенін алғыспен қабылдаймын. Халқымның жақсы тұрмысы мен үшін маңызды. Бастысы, іс-әрекетіміз, пиғылымыз дұрыс болсын. «Халқыңмен бол!» – менің ұраным. Хақ болсаң, халқыңмен болсаң, сен ешқашан жеңілмейсің. Менің ең жақсы тілегім сіздермен бірге», – деп аяқтады концертін өзбек әншісі.

ОҚИ ОТЫРЫҢЫЗ: 2018 ЖЫЛҒА ЖҰЛДЫЗ ЖОРАМАЛ - ҚИЫР ШЫҒЫС АСТРОЛОГТАРЫНЫҢ АКАДЕМИЯСЫ

ЖАҢАЖЫЛДЫҚ КЕҢЕС: СЕМІЗДІКТІ ИТ ЖЫЛЫ ДА КӨТЕРЕ АЛМАЙДЫ

КЕТТІК ТОЙҒА: КТК АРНАСЫНЫҢ ТОСЫН СЫЙЫ ЖҰҒЫСТЫ БОЛСЫН!

АЛҒАШҚЫ МЕДИЦИНАЛЫҚ КӨМЕК: ӨМІРІҢ ӨКІНІШПЕН ӨТПЕСІН

ҚҰДАЙ МАҢДАЙЫНАН СҮЙГЕН АКТЕР – ҚҰМАН ТАСТАНБЕКОВ