КТК арнасы түсірген сериал актерлерді әбігерге түсірді – Жат туыстар
Барлығымызда ағайын, туыс бар. Ал туыстармен қатынасты біз қалай түсінеміз? Жақыныңның үйіне бару, хабарласып хал-жағдайын сұрау, ауырғанда көңілін сұрау, тойына қатысу, арнайы іздеп бару, басына іс түскенде қасынан табылу – туыстық қатынас. Осы қағида қазір қалай орындалып жатыр? КТК арнасы туыс-туғандарға деген мейрімділік, жанашырлық қағидасын ескере отырып, туысқандық қарым-қатынастағы жікшілдікті, араздықты көрсететін «Жат туыстар» деген жаңа туынды ұсынды. Сериалдың актерлеріне сөз берсек....
Автор: Заира Сабитова
strong>
Осы дүниеде адам баласына бұйырған сыйлықтардың бірі – ағайын-туыс. Зар еңірегенде жұбататын, қиналғанда арқа сүйерің, қуанғанда сенімен бірге шынайы шаттанатын, еркелігіңді көтеріп қателігіңді кешіре білетін – туыстар. Қазақ туыстық қарым-қатынасты әрқашан жоғары қойған. Бірақ адамның бәрі жақын туыстай бола бермейді. Кейде сырт көзге берекелі көрінетін, бір шаңырақтың астында тұрса да бірін-бірі жек көретін, құлқынын ақша тескен ағайындар бар. Міне, КТК арнасының түсірген «Жат туыстар» телехикаясы тап осыны бейнелейді. Әр көрерменге ой салып, әр кейіпкерге қарап өзін немесе танысын көріп, ойланар деген ниетпен.
Сериалда әкесінен қалған қара шаңырақты бөлісе алмаған ағайындар арасында алауыздық туып, туыстар жатқа айналады. Бір анадан туғанмен, арасы алшақтап кеткен ағайындылар әкесінен қалған мұраға таласып талай жылдан соң қара шаңырақта қайтадан бас қосады. Сериалды ю-туб арнасынан қарауға болады.
«Жат туыстар» сериалына еліміздің өзге өңіріндегі театрлардан да жас әртістер тартылды.Фильмде мелодрама, детектив пен экшн жанрының элементтері көп. Іріктеу кастингінде бірталай қиындық болғаны жасырын емес. Себебі, телехикаяда ашық сахналар бар. Сериалды ю-туб арнасынан қарауға болады.
Марина Сүлейменова, кастинг директоры:
- Әсіресе Дананы таңдау өте қиын болды. Өйткені ол өзінше ашықтау қыз. Сол себепті көп актриса келісе алмады. Таңдау тым қиын болды. Жалпы, жобамызда жаңа актерлер өте көп, жақсыларын таңдадық.
Жанар Мақашева, актриса:
Айгүлдің рөлін сомдадым. Ол үлкен ағасының әйелі. Мінезі сан қилы болғандықтан рөл маған өте қызық. Күйеуінің көзіне шөп салып жүрген адам....
Захира Рақымжан, Баянның рөліндегі актриса:
Маған ерекше рөл бұйырды. Мұндай оқиға өмірде болады деп ойламаппын. Балалық өмірден енді қадам басып жатқан қыз қанша қиындыққа тап болады. Бала тұрмақ, үлкен кісілер көтере алмайтын жағдай басынан өтеді.
Бексұлтан Әкімжан, Асқардың рөліндегі актер:
Асқардың өзіне тән бір мінезі бар. Соны ашу міндетім болды. Экшн элементтері бар фильмге түскенді баяғыдан армандаған едім.
Дәстен Шәкіров, актер:
Маған Талғаттың образы өте қызық болып көрінді. Өйткені оның образы бір жерде жақсы, бір жерде жаман. Негізі ол барып тұрған алаяқ, әккі жігіт. Жалпы кинода, телехикаяда жағымсыз кейіпкерді сомдаған өте жақсы, өте қызық.
Гүлжамал Қазақбаева, актриса:
Бұрындары талай сериалдарға түсіп жүрмін, бірақта дәл осындай күрделі бейне әлі кездескен жоқ. Бұрын басқа елдердің сериалдарын көрген кезде «Құдай-ау, енді не болар екен, енді не болар екен» деп тағатсызданып күтетінмін. Мынау тура сондай сериал болды.
Гүлбаршын Әбу-Бәкір, «Жат туыстар» телехикаясының режиссері:
Шынайы өмірде де мұндай адамдар жоқ емес. Сол себепті де, осы сериал арқылы көрерменге ой салғымыз келеді. Қазір адамдар жылылық дегенді ұмытқан секілді. Адами қасиет, мейірімділік жоғалып бара жатқандай. Отбасы деген терең ұғымды жақсылап, жан-жақты көрсеткіміз келді.
Серікбол Өтепбергенов, , «Жат туыстар» телехикаясының қоюшы режиссері:
Өткеннің өз құпиясы бар. Қазір жасағаныңның нәтижесін көресің. Ол жемісін көрсетуі мүмкін немесе қиямет тартқызуы мүмкін. Қалай дегенмен ол саған сабақ болары анық. Образына кіріп кеткен актерлер тіпті тірідей көмілуге де шыдады. Оны сериалдан міндетті түрде көресіздер.
