«Ережесіз жекпе-жек» деген атының өзі естіген жанды елітіп әкететін, қызыл төбелеске деген қызығушылық қашан да жоғары. Бұл - нағыз жүрек жұтқан жігіттердің додасы. Рингке шыққан екенсің, бәрін ұмытып, қарсыласыңды жұлып жеуге дайын болуың керек. Таяқ-жегеннің көкесі де осында.

Спорттың осы түрінен қазақтың намысын жыртып жүрген әлемнің үш дүркін чемпионы Ардақ Назаров пен оның бапкері Сағатбек Мұсаханов және кикбоксингтен әлем кубогінің иегері Елмұрат Қайыпжанов бас болып, қаңтардың 30-күні ережесіз жекпе-жектің Бүкіләлемдік абсолюттік чемпиондар тұжырымы бойынша халықаралық жарыс өткізуді ұйғарыпты..

Ардақ Назаров, ережесіз жекпе-жектен әлемнің үш дүркін чемпионы:

- Бұл жарысты Қазақстанның ЕҚЫҰ-на төрағалық етуіне орай, қолдау көрсету мақсатында өткізіп отырмыз. Екіншіден, бұл жарысты маусым айында Астанада өтетін әлем чемпионаты алдындағы дайындық кезеңі деп қарауға болады. Елбасының 70-жылдық мерейтойына арналған Елорда төріндегі жарыста әлем чемпионының белбеуі сарапқа салынады.

Алматыдағы Республика сарайына жиналған көрермен бұл жолы Қазақстан мен Үндістан арасындағы матчтық жекпе-жекті тамашалайды. Үнділік жігіттер осал қарсылас емес. Олардың арасында ережесіз жекпе-жектің түрлі тармақтары бойынша халықаралық аренада көзге түсіп жүргендері де баршылық. Қазақстан атынан Еуразия және Азия чемпионы Бегнар Аманбаев, Азияның тағы бір үздігі - Қазбек Әшімов , әлем чемпионатының жүлдегері Төлеген Ақылбеков және Нариман Мұсаев, Аслан Тоқтарбаев, Мейірман Құрманғалиев, Жанқош Тұраров секілді дүлдүлдеріміз өнер көрсетеді. Әлем және Еуразия чемпионы Бейбіт Назаров алдағы додаға қатыспайды. Бейбіт бауырымыз маусым айында ережесіз жекпе-жектің басқа тұжырымы бойынша әлем чемпионы атағы үшін бәсекеге түседі. Оның алдында ағасы Ардақ пен бірге мұхит асып, онда америкалық жампоздармен күш байқасып қайту ойында бар.

Далластық бокс сүйер қауым кәсіпқой боксшылар филиппиндік Мэнни Пакьяо мен ганалық Джошуа Клоттиді үлкен қошемет көрсетіп қарсы алды.

Бұл екі боксшы наурыздың 13-күні Далластағы “Ковбой” стадионында орнатылған шаршы алаңда Дүниежүзілік бокс ұйымы тұжырымының чемпиондық белбеуі үшін күш сынасады. Мэнни Пакьяо чемпиондық атағын қорғайтын болса, ганалық жігіт осы атаққа үміткер. О баста филиппиндік боксшы Флойд Мейвезердің кішісімен жұдырықтасатын болған. Бірақ екі жақ ортақ шешімге келмегендіктен , Мэнни Пакьяоға басқа қарсылас іздестіруге тура келді. Бүгінгі салтанатты кездесу барысында қос боксшы да бір-біріне құрметпен қарап, жылы лебіздерін білдірді.

Күні кеше жаңа қазақ атанған экс-ресейлік теннисші Евгений Королевтің Австралия оупендегі аяқ-алысы жаман емес.

Женя екінші айналымда 6:4,6:4, 7:5 есебімен Чехияның үздік теннисшілерінің бірі - Томаш Бердыхтан алда болды. Мельбурндегі жарыстың алғашқы турынан сүрінбей өткен екінші жерлесіміз Андрей Голубев, келесі күні хорват Иван Любичичке жол берді. Әлемнің екінші ракеткасы Рафаэль Надаль словак Лукаш Лаконы оңай ұтса, бразилиялық Томас Белуччимен кездескен америкалық әйгілі шебер Энди Роддикке едәуір тер төгуге тура келді. Мұндағы есеп - 6:3, 6:4, 6:4. Мельбурндегі турнирге он бесінші нөмірмен терілген бельгиялық Ким Клийстерс бірінші айналымда біздің жерлесіміз Сесиль Каратанчеваны жарыстан шет қалдырған тай теннисшісі Тамарин Тансугарнды айқын ұтты. Екі сеттегі есеп нәтижесі де - 6:3. Ресейлік Динара Сафина 6:3, 6:4 есебімен чехиялық Барбара Захлавова-Стрыковадан мерейін асырса, оның отандастары Светлана Кузнецова мен Анастасия Павлюченкова арасындағы матч ұзаққа созылған жоқ. Қос сетті де 6:2 есебімен ұтқан Светлана Кузнецова ашық чемпионаттың келесі сатысына көтерілді.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!