Ширек финалда 1:2 есебімен Беларусьтің “Днепр” клубын ұтқан ақтөбелік футболшылар жартылай сында Литва чемпионы “Экранаспен” кездеседі.

Былтыр көпкүндік супервелодода “Тур де Франстың” бас бәйгесін иеленген отандық велоклуб “Астана” жаңа маусым алдындағы оқу-жаттығу жиынына кірісіп кетті.

Былтыр Үлкен құрлықтың белді додасы «Тур де Франста» тамаша көрсеткішке қол жеткізген “Астана” мәртебемізді бір көтеріп тастаған еді. Бірақ сол үлкен жеңіске ұйытқы болған команда менеджері Иохан Брунель мен әйгілі Лэнс Армстронг бастаған бір топ велошабандоз “Астана” қосын тастап кете барды. Құдай қаласа, экс-астаналықтардың бірнешеуін былтыр ғана жасақталған АҚШ-тың “РадиоШэк” велоклубының сапынан көретін боламыз. Басында әрі-бері бұлғақтаған “Тур де Франстың” екі дүркін жеңімпазы Альберто Контадор соңынан алғашқы райынан қайтып, бұл күндері “Астана” сапында жаңа маусымға дайындалуда. Кезекті жиынды Испанияның теңіз жағалауында орналасқан Калпе қаласында өткізіп жатқан Астананың құрамында Альберто Контадордан басқа да жұлдыздар жетеді. Мысалы, испандық Оскар Перейро немесе жерлесіміз Александр Винокуровтың қайсысы болмасын, керек кезінде команданы алға жетелеуге шамасы келетін дүлдүлдер. Алдағы жылы Альберто Контадорды алға сүйрейтін де осы екеуі болар. Калпеде ұйымдастырылған баспасөз мәслихатында Альберто Контадорға қойылған сұрақтар аз болған жоқ. Биылғы “Тур де Франсқа” қатысты ойын білдірген “Астананың” лидері: «Мен алдағы жарыстардың алғы шебінен өзіммен қатар командалас әріптесім Александр Винокуровты көргім келеді. Егер біз тізе қосып кіріссек, онда жеңістің ауылы да жақындай түсері анық” деп сөз қайырыпты.

Футболдан Англияның Лига кубогы үшін жарыстың ақтық сынында бақ сынайтын команданың бірі белгілі болды.

Өз алаңында өткен қарымта матчта “Блэкберннен” басым түскен “Астон вилла” екі ойын нәтижесі бойынша ақтық сынға жолдама алды. Бір қызығы, Бирмингемдегі бәсекені тамашалаған көрермен уақыт өте,

таблодағы есептен жаңылса, қақпашылар тордан доп шығарып шаршаған. Өйткені қос команда қосылып бір ойында он гол соғыпты. Футбол тұрмақ, хоккейдің өзінде сирек кездесетін “нәтиже” Еуропадағы күшті чемпионаттардың бірі саналатын Англия премьер лигасының өкілдері арасында тіркелді. Бүгінгі ойында алаң иелері алты доп салса, қонақтар төрт доппен жауап қайтарған. “Астон вилламен” ақтық сында күш сынасатын екінші команданы “Манчестер Юнайтед” пен “Манчестер-Сити” арасындағы қарымта матч анықтап береді.

2008-жылы Австралияның ашық чемпионатында топ жарған сербиялық теннисші Новак Джокович биыл да басты үміткерлердің қатарында.

Екінші айналымда швейцариялық Марко Кьюдинеллиді сынаққа алған Новак Джокович алғашқы сеттегі жеңісті қарсыласына беріп алды. Алайда қалған үш кезеңде өзінің шеберлігіне шек келтірмеген турнирдің үшінші ракеткасы 6:1,6:1 және 6:3 есебімен айқын жеңіске жетті. Кипр теннисінің маңдайалды жұлдызы Маркос Багдатис пен испандық Давид Феррер арасындағы бәсеке ұзаққа созылды. Мүмкін болған бес сет бойы тер төккен қос теннисші арасындағы шиеленісті өткен бәсеке Маркос Багдатистің жеңісімен аяқталды. Осы күні америкалық Дональд Янг пен жолы түйіскен Ллейтон Хьюит те жергілікті жанкүйерлердің үмітін алдаған жоқ.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!