Ұлттық бірыңғай тестілеу елімізде биыл 5-ші мәрте өтіп отыр. Содан болар, түлектердің бұл жүйеге үйрене бастағанын байқауға болады. Дегенмен ата-аналар ішінде әлі күнге тест - оқушының нақты білімін көрсете алмайды деп есептейтіндер аз емес.

Жарқын Қартбаева:

- ҰБТ негізі дұрыс емес қой. Өзіміз кезінде 4-5 емтихан тапсырдық. Ол нағыз білімді көрсетеді. Ал мынау кімнің қалай жолы болады деген ғой...

Жыл сайын дау-дамай сұрақтардың қисынсыз әрі мектеп бағдарламасына сәйкес келмеуінен туындап жататын. Білім және ғылым министрлігі бұл жолы сұрақтарды барынша жеңілдетуге тырысқан сыңайлы. Өйткені емтиханнан шыққандардың басым бөлігі жақсы тапсырғанын айтты.

Мерей Кенжебаев, талапкер:

- Сұрақтар оп-оңай болды. Сол мектеп бағдарламасында өткен дүниелер. Менім ойымша, 70-80 балл алам-ау...

Түлектерді аудиторияларға арнайы құрылғылармен тексеріп өткізетіні белгілі. Алайда қауіпсіздік қанша жерден күшейтіліп жатқанымен, айласын асырып, ішке ұялы телефонымен кіргендер де бар екен.

Әнуар Әбдірашов, талапкер:

- Телефонсыз кірдім, бірақ телефон алып кіргендер болды. Ұсталғандарды телефонымен бірге шығарып жіберді.

Емтиханнан нақты қанша баланың қуылғанын анықтау бүгін мүмкін болмады. Себебі барлық комиссия мүшелері сынақтан соң бірден тексеру шараларына кірісіп кетті. Жалпы Астана қаласы бойынша “Алтын Белгіден” үміткер 132 оқушы бар. Олардың бұл үміттері қаншалықты ақталғаны енді тест қорытындысы шыққанда белгілі болады. Егер түлектер тест нәтижесімен келіспесе, ертең түстен бастап апелляциялық комиссияға шағымдануға құқылы.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!