Бұл күндері қолына жолдама тиген әлемнің үздік құрама командалары Оңтүстік Африка республикасына ағылуда. Мұнда 11-маусым күні кезекті әлем чемпионаты жалауын көтереді. Сапында Арьен Роббендей футбол баһадүрі өнер көрсететін Голландия құрамасы да басты үміткерлердің қатарында.

Бүкіл Голландия құдайындай сеніп отырған футболшының бірі - Арьен Роббен. Биылғы маусым “Баварияның” сапында алмастай жарқылдаған сұр мерген сәл болмағанда әлемдік додадан сырт қала жаздады. Венгриямен өткен жолдастық матчта Роббеннің жарақат алуы команда қосы тұрмақ, бүкіл жауқазын елін пұшайманда қалдырды. Олар үшін Роббен жарақат алған матчтағы ірі жеңістің құны көк тиынмен тең еді. Бірақ әліптің артын баққан құраманың бас жаттықтырушысы Берт ван Марвейк қандай да бір қадам жасауға асыққан жоқ. Ол журналистерге берген сұхбатында “Роббеннің орнына ешкімді шақырмаймын, кішкентай мүмкіндік болып жатса оның өзін ертіп шығам ” деп мәлімдеді. Абырой болғанда медициналық тексерудің нәтижесі көрсеткендей, Арьен Роббеннің жарақаты жеңіл-желпі болып шықты. “Е” тобынан табылған Голландияға алдағы әлем додасында Дания, Камерун және Жапония құрама командалары қарсы тұрады. Ал қазақтың “футбол керуені” Азия мен Еуропа арасын жолы қылып жүргенде , өзбек ағайындар әлем чемпионатын қабылдайтын Африкаға жетіп алыпты. Бұл шындық. Алдағы мундиальдың беташар матчына әділқазылық жасауға өзбек төрешісі Равшан Ирматов бекітіліпті. Осындай мәртебеге ие болған өзбекстандық арбитр 11-шілде күні жасыл алаңға Оңтүстік Африка Республикасы мен Мексика футболшыларын бастап шығады.

“Ролан Гарростың”ақтық сынында швед Робин Содерлингке дес бермеген испан теннисшісі Рафаэль Надаль мәртебелі жарыстың бес дүркін чемпионы атанды.

Былтыр осы жарыстың төртінші айналымында Рафаэль Надальды ұтқан швед теннисшісі шешуші матчта Роджер Федерерден ұтылып қалған еді. Бұл жолы ойын алаңында билік құрған Надаль үш сеттегі бәсекені 6:4, 6:2 және 6:4 есебімен өз пайдасына асырды. Кезінде Францияның ашық додасында алты мәрте топ жарған әйгілі швед Бьорн Боргтің рекордын қайталау үшін Надальға тағы бір титул жетіспей тұр. Небәрі 24 жастағы испан жігіті үшін бұл нәтиженің де ауылы алыс емес екені анық. Бүгінгі жеңстен кейін Рафаэль Надаль Кәсіпқой Теннисшілер Қауымдастығының рейтинг кестесінде бірінші орынға көтерілді. Ал әйелдер додасында турнирдің бас жүлдесін италиялық теннисші Франческо Скьявоне иеленді. Өзінің спорттық биографиясында тұңғыш рет “Үлкен Дулыға”аясындағы жарыстың жеңімпазы атанған италиялық шебер финалдық бәсекеде австралиялық Саманта Стосурдан алда болды.

Стэнли кубогін сарапқа салып жатқан “Чикаго” мен “Филадельфия” финалдық серияның бес ойынын артқа тастады. Чикагода өткен бесінші кездесуде қонақтардың адымын аштырмаған алаң иелері ірі есеппен жеңіске жетті.

Бүгінгі матчта “Чикагоның” шабуылшысы Дастин Бафлин өте нәтижелі ойын көрсетті. Өзі қос гол соғып көзге түскен мерген, тағы екі шайбаға қолғабыс жасады. Кездесудің бірінші кезеңінде аса ширақ қимылдаған алаң иелері “Филадельфияның” қақпашысын үш рет қапы қалдырды. Одан әрі алма-кезек шабуылға жалғасқан бәсекедегі жеңістің ұшы, түптеп келгенде 7:4 есебімен жергілікті хоккейшілердің есебінде қалды. Финалдық серияның келесі матчы 9-маусым Филадельфияда өтеді. Артта қалған бес кездесуден кейін үш рет жеңіске жеткен “Чикаго” әзірге жалпы есепте алда келеді.

Былтыр Магнитогорскінің “Металлургі” сапында өнер көрсеткен 25 жастағы Константин Пушкарев алдағы екі маусым “Барыстың” намысын жыртатын болады. Астаналық клубтың ресми сайты осылай деп хабарлайды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!