Қазақ ұлттық педагогикалық университеті былыққа белшесінен батқан
Ұлы Абайдың аты берілген Қазақ ұлттық педагогикалық университеті былыққа белшесінен батты. Білім шаңырағында жең ұшына жалғасқан жемқорлық, тамыр-таныс, жершілдік кең етек алып кеткен. Бүгін аталмыш оқу орнының ұстазы осындай мәлімдеме жасады. Бірнеше мысал келтірген Сағадат Әділбеков құқықтарының аяқ асты болып отырғанын айтады. Ал оқу орны басшылығы: «мұның барлығы жалған, дәйексіз әңгіме» деп отыр.
Автор: Бекзат Жүсіп
22.12.2010
Сағадат Әділбеков Абай атындағы Қазақ ұлттық педагогикалық университетінің журналистика бөлімінде тәлім береді. Тәжірибелі ұстаз: «Соңғы уақытта оқу орнында жемқорлық кең етек жайды», - дейді. Сәйкесінше, білім сапасы да төмендеген. Оған мысал: арнайы тест арқылы жақында студенттердің білімі тексеріліпті. 30 пайызы ғана сыннан сүрінбей өтіп, қалған 70 пайызы құлаған. «Мұның соңы ұстаздардан ақша жинаумен аяқталды», - дейді ашынған ұстаз.
Сағадат Әділбеков, Саяси ғылымдардың кандидаты, доцент, Абай атындағы ҚазҰПУ оқытушысы:
- 30-35 пайызды 100-ге жеткізу үшін ректор: «ақша жинаңдар» деді. Әр мұғалімнен мың теңгеден. Бізде бас аяғы мың мұғалім бар, сонда бір миллион теңге жинап отыр.
Сондай-ақ университетте ректордың тамыр-танысының, жерлесінің айы оңынан туып тұрған көрінеді. Тіпті ғылым докторы болу да оңайлап кеткен. Ал оқу орнындағы диссертациялық кеңестің төрайымы Дана Медеуованың өзі докторлық еңбегін орыс ғалымдарынан «айна-қатесіз көшіріп алған» дейді Сағадат Әділбеков.
Сағадат Әділбеков, Саяси ғылымдардың кандидаты, доцент, Абай атындағы ҚазҰПУ оқытушысы:
- 25 жасында докторлық қорғап отыр. Көріп отырсақ, онда 8 бетін орыс ғалымының еңбегінен көшіріп алған, үтір-нүктесіне дейін, бір сөз қалдырмай.
Мән-жәйді білмек болып университет ректоры Серік Пірәлиевке бардық. Алайда басшы орнында болмады. Ал қосшылары бұл мәлімдеменің бәрі «қып-қызыл өтірік» деп отыр.
Раушанбек Әбсаттаров, Абай атындағы ҚазҰПУ диссертациялық кеңес төрайымының орынбасары:
- «Жемқорлық біздің университетте соңғы кезде күшейіп кетті» деген шындыққа сәйкес келмейді. Мен толық айта аламын, бұл - өтірік. Мен білмеймін, естіген жоқпын. Ақшаны өзімнен жинаған жоқ. Менің кафедрамнан да жинаған жоқ.
Раушанбек Әбсаттаров әріптесінің бұлай мәлімдеме жасауына итермелеген «басқа жағдай» дейді. Айтуынша, Сағадат Әділбеков белгіленген ережеге қарамай, екі-үш айдың көлемінде ғылым докторы атағын қорғамақ болыпты. Келіспеген әріптестеріне ренжіген ісі көрінеді.
Дегенмен Сағадат Әділбеков әділдік орнамайынша, алған бағытынан қайтпайтындығын айтады. «Тіпті қызметімнен қуылсам да, оқу орнындағы жемқорлықты дәлелдеймін» - деп бел буып отыр ұстаз.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
