Павлодар тұрғыны қызғаныштан әйелінің көңілдесін жарып жібермек болды
Автор: Айжан Әлібек
04.12.2012
Павлодар қаласының тұрғыны қызғаныштан әйелінің көңілдесін жарып жібере жаздады. Күдікті қолдан жарылғыш зат жасап, оны бақталасының көлігінің астына орнатқан.
Көп ұзамай қолға түскен 30 жастағы азамат бұл қылығын ішімдікке тойып алып жасағанын мойындады. Айтуынша, сүйіктісі көзіне шөп салған. Қызғаныштан өзегі өртенген ол ірі құрылыс дүкенінде бастықтың орынбасары болып істейтін бақталасының көзін жоюдың амалын қарастырады. Ғаламтордан жарылғыш заттың жасалу әдісін тауып, жымысқы ойын жүзеге асыруға кіріскен. Детонатор ретінде кәдімгі ұялы телефонды, ал жарылғыш заттың орнына жаңажылдық отшашу мен күкірт қолданған. Сөйтіп, бомбаны түн ортасында бақталасының көлігі астына орнатып кетіпті. Мастығынан айыққан соң, бұл ойынан бас тартқанымен, тым кеш еді. Бақытына орай, көлік иесі жарылыс болардан бірер минут бұрын дүкен ішіне кіріп кеткен екен.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
