Депутаттардың Мемлекеттік арналар мен басылымдар жұмыстарына көңілдері толмайды
Автор: Ербол Сейілхан
06.12.2012
Мәжілісмендер журналистерге қалай жұмыс істеуді үйретпекші? Бүгін депутаттар бюджеттен қаржыландырылатын арналар мен басылымдардың жетекшілеріне шүйлікті. Мемлекеттің саясатын дұрыс насихаттай алмай отырғаны үшін. Тағы бір қапаланатыны олардың әрқайсысына қазынадан миллиондаған теңгенің тапсырыстары бөлінеді. Алайда бағдарламалар мен мақалалардың сапасы сын көтермейді.
Осылай деп ашынған халық қалаулылары Мәдениет және ақпарат министрі Дархан Мыңбайға мұңдарын шақты. Бірі отандық телеарналар «көшірмеге» айналып кетті десе, екіншісі ресми басылымдар биліктің саясатын «ұрандатып» жеткізуден әріге аса алмай жүргенін қынжыла айтты. Одан қалды депутаттар мемлекеттік арналардағы ток-шоуларға қатысудан неліктен бас тартатындығын да жасырмады. Айтуларынша, журналистер өздерін құшақ жая қарсы алмайды. Ал сөйлеген сөздерінің көп бөлігі монтажда «қиылып» қалады екен. Осыған қатты өкпелеген мәжілісменнің бірі тіпті тілшілер бізді «алалайды» деп салды.
Мұрат Ахмадиев, Мәжіліс депутаты:
- Журналистерді аңдып отырамын. Егер қандай бір депутат сырты ғана жылтыраған арзанқолдау дүниеге ұқсас мәселе көтерсе соны барлығы қуалай жөнеледі. Мен мәдениет туралы заңды әзірлеуге 5 жыл уақытымды сарп еттім. Қалай болып жатыр деп бір тілші келмеді. Бес жыл болды әлі күтіп жүрмін.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
