Апатқа ұшыраған МИ-8 тікұшағының «қара жәшігін» ресейліктер тексермек
Автор: Гүлнұр Имандосова
06.12.2012
Алматы облысында апатқа ұшыраған МИ-8 тікұшағының «қара жәшігін» ресейліктер тексермек. 7 күн бойы Алматыдағы арнайы техникалық орталықта «қара жәшіктегі» мәліметті оқымақ болған отандық мамандар ақыры нәтиже шығара алмапты. Сондықтан Ресейдің мемлекетаралық әуе комитетінің ғылыми-техникалық орталығындағы зертханаға жіберілген.
Енді осында өздігінен жазып отыратын құралдағы жазулар арқылы тікұшақтың қалай жұмыс істегенін, экипаж командирінің аэронавигациялық қызметпен байланысы болған-болмағанын, тіпті борттағы адамдар бір-бірімен не сөйлескеніне дейін анықтамақ. Зерттеу нәтижесі 10 күн ішінде белгілі болады деп күтілуде. Естеріңізге салсақ, МИ-8 тікұшағы 24-інші қараша күні Атасу-Алашанькоу мұнай құбырын әуеден бақылауға шығып, Алакөл ауданында ізім-ғайым жоғалған болатын. Іздестіру тобы оның қалдықтарын тек 5 тәуліктен кейін тапты. Әуе көлігінің бортындағы 8 адам түгел қаза тапқан.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
