Елімізде 18-27 жас аралығындағы жігіттерді көктемгі әскер қатарына шақыру науқанына әзірлік басталды. Тиісті жарлыққа бүгін Жоғарғы бас қолбасшы Нұрсұлтан Назарбаев қол қойды.
Қазір жер-жердегі қорғаныс басқармаларында тіркеуде тұрған азаматтарға шақырту қағаздары жөнелтілуде. 1-ші сәуір мен шілденің соңына дейін созылатын науқан аясында Қарулы күштер сапына 16 мың жігітті іріктеу көзделіп отыр. Оның тең жартысы Қорғаныс министрлігінің бөлімдеріне, қалғаны мемлекеттік «Ұлан» гвардиясы, Ішкі Әскер мен шекара шебіне жіберіледі. Көктемгі шақырту кезінде болашақ сарбаздар медициналық тексерістен өзге психологиялық тесттен өтуі міндет. Талап қатал. Барлық сыннан сүрінбей өткен ғана Отан алдындағы парызын өтеуге жолдама беріледі. Қорғаныс министрлігі құзырлы мекемелер мен ұлттық компанияларда істейтін азаматтардың қызметі мен шен-шекпеніне қарамай бәрін тегіс шақырамыз деп отыр.
Амантай Өсербаев, ҚР ҚМ Департамент бастығының орынбасары:
- Бойы ұзын, дені сау, психологиялық жағынан дайын болған азаматтардың таңдап әскерге аламыз. Әскерге барам дегендер көп. Ішінен іріктеп аламыз. Тепсе темір үзетіндей жігіттерді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
