Семейлік отбасы ұлының мүрдесін бесінші рет жерледі. Қаскүнемдердің қолынан қаза тапқан Раиль Зайнеевтің мәйіті тергеу амалдары кезінде жатқан жерінен 3 рет қазылып алынған еді.
Көлік жөндеумен айналысатын 35 жастағы азаматты әріптестері өлімші етіп ұрып, орманға көміп кетіпті. Екі жылға созылған тергеу барысында мәйіт үш мәрте сараптамаға алынған. Сотта Раильді болмашы қарыз үшін бірге істейтін 3 жігіттің өлтіргені анықталды. Әрқайсысы енді 11 жылдан арқалап, жазаларын қатаң тәртіптегі колонияда өтейтін болады. Әрі марқұмның туыстарына 3 млн теңге өтемақы төлеуі тиіс. Айыпталушы тарап апелляциялық шағым түсірмекші. Ал ұлын 5 мәрте жерлеген ата-ана сот үкіміне көңілдері толып отыр.
Камиль Зайнеев, Раильдің әкесі:
- Маған ұлымның сүйектері салынған қорапты берді. Раильді кішкентай күнінде қолыма ұстағаным есіме түсіп, көзіме жас іркілді. Қайтадан жерледім баламды. Ал соттың шешімі әділ.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
