Полиция бөлімшесіне барып, ауруханадан бір-ақ шықты. Қызылорда облысында тәртіп сақшылары мас жігітті аяусыз соққыға жығып, істемеген қылмысты мойындатпақ болған. Ауыр соққыдан жас жігіт жарымжан болып қалды. Дәл осындай келеңсіз жайтты Ақтау тұрғыны да басынан кешкен. Мұнда да жұдырық ала жүгіргендер жігіттің ащы судан ұрттап алғанын пайдаланыпты.

Шиелі ауданының тұрғыны Аслан Дүйсенбаев үшін кезекті көтеріңкі отырысы қайғылы аяқтала жаздады. Дастархан басында қонақтардың бірімен сөзге келіп қалған жігітті шақыртумен келген полиция бөлімшеге алып кетіпті. Тәртіп сақшылары оны сол жерде ұрып-соғып, істемеген қылмысты мойындатпақ болған.

Аслан Дүйсенбаев, жәбірленуші:

- Таяқпен ұрып, басыма дорба кигізіп, қолымды артыма байлап тастап, ұрып-соғып 3 полиция қызметкерлері осындай халге жеткізді.

Тіпті есімнен танып құлағанда да тоқпақтауын қойған жоқ дейді жәбірленуші. Тәртіп сақшылары тек істің насырға шапқанын түсінгенде жедел жәрдем шақыртыпты.

Сәулет Рашбаев, Шиелі аудандық ауруханасының бөлім меңгерушісі:

- Келгенде науқастың жағдайы ауыр. Денесінде жарақаттар бар, науқас жеде тексерілді. Ішкі құрылысына узи жасалып, ішкі құрылысынан сұйықтық анықталды.

Осылайша, бөлімшеге өз аяғымен жеткен Аслан операция үстелінен бір-ақ шыққан. Қазір жігітті жарымжан еткен үш полицейге қатысты іспен прокуратура айналысып жатыр. Ақтау тұрғыны Жалғас Тойбеков те тәртіп сақшыларынан таяқ жегендердің бірі. Айтуынша, полицейлердің озбырлығынан бір бүйрегінен айырылып, қазір мүгедек атаныпты. Патруль қызметкерлері Жалғастың қызу екенін пайдаланып, білгендерін істеген көрінеді.

Жалғас Тойбеков, жәбірленуші:

- Қалтаңда не бар деп сұрап, тексере бастады. Мен оларды ойладым, қалтама басқа зат салып жібере ма деп  итеріп жібердім. Не қарсылық көрсетіп тұрсың ба деп ұра бастады. Сосын көліктің  артына салып алды, қайда апарғанын білмеймін.

Қатты соққыдан жігіттің бүйрегі түсіп, ішінде қан ұйып қалған. Енді екі аптадан бері төсектен тұра алмай жатыр. Өздігімен дәретін де сындыра алмайды. Бірақ полицейлер өздеріне шаң жуытар емес. Жалғасты жарымжан еткен айықтырғыштағы күзетшілер деп отыр.

Бердібек Нысанбаев, Маңғыстау облыстық ІІД бастығының орынбасары:

- Бейнебақылауда көрініп тұр, кімдердің ұрып-соққаны. Біздің қызметкерлердің қатынасы жоқ екені дәлелденіп тұр. Бүгін 230-шы  баппен іс көтеріліп, күзет  мекемесіне бүгін іс жүргізілуде.

Ал, жәбірленушілердің туыстарының бұған сенгісі жоқ. Отағасын жарымжан еткен полицейлер екенін енді сотта дәлелдемек.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!