Арқанкерген бекетінде 15 адамды қырып салған Владислав Челах Алматыдағы уақытша ұстау изоляторынан Қостанай облысындағы УК 161/3 қатаң тәртіптегі колонияға ауыстырылды. Айта кету керек, бұл еліміздегі өмір-бақи бас бостандығынан айрылғандар жазасын өтейтін жалғыз абақты. Кеше ғана Челахтың анасы мен адвокаты сотталушының қайда кеткенін білмейміз, аяқ асты ғайып болды деп айтқан еді. 14 қаруласын өлтіріп өртеп одан соң бір қорықшыны атып тастаған шекарашы жазасын өтейтін түрменің жайы, аса қауіпті қылмыскерлерді ұстау тәртібі қандай?

Атынан адам үркетін атақты абақты осы. Мұнда ауыр қылмыс жасап, өмірінің соңына дейін түрмеге тоғытылсын деп үкім кесілгендер жеткізіледі. Жетіқара елді-мекеніне жақын бұл түрменің тәртібі темірдей. Қашып шығамын, жазадан сытылып кетемін деген ой ешкімнің басына келмейді. Айта кетсек, қылмыскерлер соңғы рет аталмыш абақтыдан ширек ғасыр бұрын қашып шығуға талпынған. 30 метрлік жер асты жолын да қазыпты. Бірақ нәтижесіз. Мұнда жеткізілген жазасын өтеушілер жол бойы түкте көрмейді, қолдары бір сәтке де босатылмайды.

Іштегі тәртіпте тіптен қатал, ұйқыға жатқанда да қос қолды жамылғының ішіне салуға болмайды және камерадағы жарық сөндірілмейді. Челахтан өзге 30-дан астам жазасын өтеуші бар мұнда әзірге. Жалпы тәртіп бойынша жазасын өтеушілер туысқандарымен жылына екі-ақ рет кездесе алады. Ал Владислав Челах қазір 15 күндік карантинде. Яғни осы уақытта оның құжаттары тексеріледі, қылмыстық ісі қаралады, медициналық тексеруден өтеді. Психологпен тілдесу сағаты да болады.

Динара Рахменова, Қылмыстық-атқару жүйесі комитетінің Қостанай облысы бойыншы департаментінің қызметкері:

- Владислав Челах 5 наурызда келді. Ол кәдімгі камерада отыр. Күн тәртібі бөлінген, түрменің тәртібімен жүреді. Жетіқараға келген бойда отбасына арнайы хат жіберілді, баларының қай жерге жеткізілгені және жылына қанша рет кездесуге болатыны жазылған.

Бұл абақтының тағы бір аты “Қара Бүркіт”. Тәртібі мен әрі сотталушылардың барлығынасес болғандықтан осылай аталған. Челахқа бұл жақта ерекше жағдай жасалмайды, өзгелерден өзгеше көзқарас та болмайды. Түрмеден сытылып кету мүмкін емес деп алғашында айттық, мамандардың сөзі.

“Қара Бүркітке” жуырда ғана жеткізілген Челах расында қашуды ойлай ма, жоқ әлде бұл оның кезекті рет тергеу тобының алдында тентек көрінгісі келгені ме беймәлім. Әзірге Жетіқара жерінен қашып құтылған қылмыскер жоқ. Айта кету керек, өмір бойына сотталғанымен қатар Челах Арқанкергендегі қанды қырғында жапа шеккендерге материалдық әрі моральдық шығыны бар жалпы 32,8 миллион теңге өндіріп беруі керек.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!