Еліміздің азаматтық авиациясын қадағалайтын орган жоқ. Ал бұл іске жауапты көлік және байланыс министрлігіндегі комитеттің қолы байлаулы. Себебі олар әуе тасымалдаушыларға тек ұсыныстар жасаумен ғана шектелуге мәжбүр. Яғни басқару немесе нұсқаулықтардың орындалуын талап ете алмайды. Оның үстіне азаматтық авиация комитетіндегілердің тең жартысы өз саласының мамандары емес екен. Сондықтан бүгін әуе тасымалдаушыларының қауымдастығы авиация мәселесіне көңіл аударуды сұрап, президентке ашық хат жолдады.
Қыруар қаржы жұмсалғанымен еліміздегі азаматтық авиация қарапайым қауіпсіздік ережелеріне қол жеткізе алмай отыр. Ұшақтарды ретке келтірер инспекция құрылмаған. Ал жауапты комитет тек ұсыныстар жасауға қауқарлы. Сондықтан жауапкершілікті сезінбеген тасымалдаушылар қауіпсіздік пен сапа атаулыны ысып қоя бастады дейді депутаттар.
Ғани Қасымов, Сенат депутаты:
- Қазақстандағы әуе кеңістігі жайындағы заңның іс жүзінде күші жоқ. Барлық мемлекеттерде әуе кодексі қабылданып, талаптар да бекітілген. Бізге де сол бағытта жылжу қажет. Қайғылы оқиғаларды негізге алуды емес, болашақта өзімізге қолайлы жағдай жасалуы керек.
Қазірдің өзінде отандық әуе компанияларының көбі Еуроодақтың қара тізіміне ілінген. Негізінен оған Қазақстанның авиация мәселесіне жауапты органның әрекетсіздігі себеп. Яғни авиация жұмысының тиісті қадағаланбауы мен дұрыс жабдықталмауы. Ең бастысы қарапайым планерден бастап алып лайнерлерге дейін сертификаттау, тіпті тіркеу жұмыстарымен тікелей айналысатын мемлекеттік орган осы күнге дейін бекітілмепті.
Владимир Куропатенко, ҚР әуе тасымалдаушылары қауымдастығының төрағасы:
- Әуе көліктерін тексеру үшін ұшақтарға баруға арнайы рұқсаттар қажет. Бірақ ол қағаз әркімге беріле қоймайды. Комитет мамандары бұл іспен айналыспайды. Ал көлік прокуратурасы барғанымен ештеңені түсінбейді. Сондықтан іс жүзінде емес, тек қағаз бойынша біздің ұшақтардың техникалық жағдайы жақсы.
Соңғы уақытта адам өлімімен аяқталған қайғылы оқиғалар бірден қос министрліктің жұмыс сапасын көрсеткен. Міндетін салғырт орындап, сапасыз қызмет еткендер қатарында Көлік және коммуникация министрлігі мен Қорғаныс министрлігіне қарасты "Казаэронавигация" мекемесі аталуда. Оларда тіпті әуе кемелерінің ұшуы жайлы қарапайым әдістеменің жоқ екендігі белгілі болып отыр. Ең сорақысы азаматтық авиация комитетіндегі қызметкерлердің жартысынан астамы өз саласының мамандары емес.
Серік Мықтыбаев, Азаматтық авиация комитет төрағасының орынбасары:
- 10-15 жыл ішінде біз көптеген мамандарымыздан айырылып қалдық. Себебі олардың көпшілігі басқа салаға ауысып кеткен. Себебі олардың жалақысы мен жағдай жақсырақ. Сондықтан қазір азаматтық авиацияда кадрлар тапшылығы бар.
Әуе тасымалдарының қауіпсіздігін қадағалайтын мемлекеттік комиссия тек Кеңес кезеңінде болған екен. Ал 1991 жылы бұл комиссия таратылып, мемлекетаралық авиация комитеті міндеттерді өз қолына алыпты. Бірақ жұмыс нәтижесіз болғандықтан бүгін әуе тасымалдаушылары қауымдастығы авиация мәселесіне көңіл аударып, жұмыстың оңды жолға қойылуын сұрап, президентке ашық хат жолдады.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
