Петропавлда әйелдің өмірдегі ең басты парызы –ана болу бақытына арналған фотокөрме ашылды. Суреттерде жүкті әйелдер мен баласының шуағына бөленіп тұрған аналардың бақытты сәттері бейнеленген.
«21 ғасырдың Мадоннасы» деп аталған көрмеге жергілікті авторлардың туындыларымен қоса Польша, Италия, Африка және ресейлік фотографтарының жұмыстары қойылыпты. 33 автордың 70-ке жуық еңбегі көрермен көзайымына айналды. Суреттер саны бұдан да көп болуы керек екен. Алайда шетелден электрондық поштамен жіберілген жұмыстарды Петропавлда сапалы қылып басып шығаратын баспахана табылмапты. Сондықтан сапасы сақталған шетелдік туындылар ғана көрмеден орын алды. Жергілікті авторлардың айтуынша, жүкті әйелдермен жұмыс істеу қиын екен. Өйткені олардың көбі ұялатындықтан, эмоцияны түсіріп алу оңай емес дейді. Айта кетерлігі, көрмеден орын алған әр суреттің өзіндік тарихы да бар.
Валентина Воробьева, Петропавл қалалық бейнелеу өнері мұражайы директорының орынбасары:
- Мына Германиядан жіберілген суреттің тарихы қызық. Мұнда бейнеленген әйел ауруханаға келгенде оның құрсағындағы баланың жүрек соғысы байқалмаған. Дәрігерлер әйелге дереу ота жасап, баланы аман алып қалыпты. Мына суретте сол ұлын аман -есен дүниеге әкелген әйелдің бақытты сәті бейнеленген.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
