Шығыс Қазақстанда бүтін бір отбасы далада қалды. Бір апта бұрын Раевтар отбасының үйі өртеніп кеткен. Омбы қардан ауылға баратын жол тазартылмағандықтан өрт сөндіру көлігі жеткенше баспана күлге айналыпты. Қолында Даун синдромымен ауыратын 25 жастағы ұлы мен екі немересін құшақтаған Тұйғын Раева енді көршілерін жағалап жүр. Төтенше оқиға осыдан бір апта бұрын орын алса да, жергілікті билік көмекке мұқтаж жанға қол ұшын созуға асықпай отыр.

Қыс бойы қардан тазартылмаған көше жолының салдарын  бүтіндей бір отбасы көріп отыр, енді. Күн жылынғалы қарғын судан көшеде аяқ алып жүру мүмкін болмай қалып, Раевтардың  үйін тілсіз жау ораған кезде, өрт сөндіру көлігі оқиға орнына  дер кезінде жете алмапты.

Наурыздың бесі күні жатын бөлменің электр шамынан тұтанған от үйдің ішін лезде жалмаған. Шыға беріс есіктің маңы қызыл жалынға оранғанда екі немересі мен жарымжан баласын терезені сындырып, сыртқа шығарыпты. Үй иесінің жанайқайына бірінші көршілері жетіп, өртті сөндірмек болғанмен, нәтиже болмады. Сөйтіп бір күнде шаңырақтары шайқалып, далада қаңғып қалған. 

Тұйғын Раева, ШҚО, Таврия ауылының тұрғыны:

- Екі немерем, ауру баламмен далада қаңғырып жүрмейтіндей, басыма баспана керек. Жеткізу керек маған немерелерімді, маған ауыруға да өлуге де болмайды.

Қалың қардан елді-мекеннің шеткері жатқан көшелері ашылмаған. Сондықтан өрт сөндірушілер жеткенше, баспананың тек күлі ғана қалыпты.    

Рауан Әбікенов, Таврия ауылы өрт сөндіру бөлімінің бастығы:

- Қар қалың жауды. Жолдар жоқ. Сол себепті оқиға орнына дер кезінде жете алмадық.

Тұйғынның қолындағы қос немересі –қызының балалары. Жастай жесір қалған қызы қазір қалада күн көрістің қамымымен жүр. Егде әйел басына түскен ауыртпалықты айтып, ауыл әкімінің алдына барған. Бірақ шенеуніктен әлі қайыр болмапты.

Әділбек Рамазанов, Таврия ауылдық округінің әкімі:

- Мен одан қашпаймын, қолдан келгенше көмектесем. Ол маған үй керек деп отыр. Бізге келсін арыз жазып, қажетті құжаттарын тапсыру керек.

Таврия ауылында қаңырап тұрған баспаналар жеткілікті. Сондай бір иесіз үйді берсе, қалғанын өзім ретке келтірер едім дейді Тұйғын. Қазір ол  науқас ұлы мен екі немересімен көршінің үйіндегі бір бөлмені пана тұтқан. Бұл жанұяға қол ұшын созғандар да бар. Жергілікті аурухана төсек-орын мен көрпесін әкеп берсе, мектеп ұжымы киер киім-кешек жинап беріпті.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!