Австрия Рахат Әлиевтің кінәлі екенін мойындады. Австриядағы Қазақстанның бұрынғы елшісі ақша бопсалау және заңсыз қаржы айналымдарын іске асыру үшін ұйымдасқан қылмыстық топ құрғандығына аталған елдің Жоғарғы соты енді толығымен көз жеткізіп отыр. Сонымен қатар Нұрбанк менеджерлерінің ісі бойынша марқұм  Жолдас Темірәлиев пен Айбар Хасеновтың әйелдері берген түсініктерге сенуге болады деген шешім шығарыпты. Ал елімізде саяси қудалауға ұшырадым деп, Австриядан баспана сұраған Әлиев бәрі бір жақын арада құрықтала қоймайтын түрі бар. Себебі ол Мальтаға қоныс аударғандықтан енді қайтадан халықаралық іздеу жариялануы мүмкін.

Австриядан саяси баспана сұрап, кейін сақшылардың іс-әрекетіне шағымданған Рахат Әлиевтің Венадағы кеңсесі мен үйінде табылған құжаттар оның түбіне жетуі мүмкін. Былтырғы жылдың жазында тексеру жұмыстарын жүргізген Австрия прокуратурасы Қазақстанда Әлиев қолымен жасалған қылмыстарды дәлелдейтін дәйектерге қол жеткізген. Сондықтан қазір Рахат Әлиевтің немесе енді Рахат Шоразтың ісі Еуропа елінің әділет министрлігі қараған ең ауқымдысы болып отыр. 

Габриэль Лански, адвокат:

- Әлиев Австрияға келе сала билік басындағыларға пара беру арқылы өз айналасын бекітіп алды. Сондықтан ол бірнеше жыл бойы қылмыскер емес, жәбірленуші ретінде қаралып келген. Бірақ тергеу барысында оның Қазақстанда да, Еуропада да жасаған қылмыстары әшкере болып отыр.

Елімізде ұйымдасқан қылмыстық топ құрған Рахат Әлиевтің әрекеттері 2007 жылы «Нұрбанк» менеджерлерінің із-түссіз кеткеннен соң белгілі болды. Сол кезде Ұлттық қауіпсіздік комитетінің бұрынғы басшысы Әлнұр Мұсаев пен Вадим Кошляктар заңды аяқ асты етіп, қаржы жымқырды деп айыпталғандарды өздігінше жазалаған. Олар Жолдас Темірәлиев пен Айбар Хасеновті ұрып-соғып, психотроптық дәрілерді енгізген. Дүние-мүлкін аударуды талап еткендер ақыр соңында менеджерлерді полиэтилен қаптармен тұншықтырып, мәйіттерін әк толтырылған бөшкелерде жасырған. Кейін Әлиев құрған қылмыстық топ нағыз фашистік тәсілдерді қолданғаны анықталды.

Норберт Хазльхофер, Венаның бұрыңғы прокуроры:

- Бір тұлға бойында осындай энергетиканың жинақталғаны мені қатты алаңдатты. Ол аюандықпен адамдарды өлтіріп, ойына келгенін жасаған. Бастысы бұл әрекеттер оған ляззат әкелген сыңайлы. Себебі мәйіттердің бастарын тақырлап қырып тастаған. Өзіндік бір ерекшелігі бар.

Сонымен қатар саяси баспана сұраған Әлиев Австрияны заңсыз қаржы аударымдары үшін пайдаланғаны белгілі болды. Бұрынғы елші Австрия арқылы кемінде 150 млн. долларды Швейцария, Мальта, Германия мен Таяу Шығысқа аударған. Ал жуырда Әлиев «Metallwerke Bender Rheinland» металлургиялық зауытын сатып алған соң Германияның ішкі істер министрі Отто Шили оны құрықтау қажет екендігін айтқан. Себебі жалпы соммасы 10 млн евроға бағаланатын жүзден астам заңсыз аударымдардың беті ашылған.

Анна Цайтлингер, адвокат:

- Миллиондаған евро Еуропаға жолданған. Бірақ Австрия заңнамасында Рахат Әлиевтің Қазақстаннан заңсыз алып шыққан барлық қаржыны қайтарып бере алатын тетіктері бар. Ол үшін тағылған айыптардың барлығы расталып, сот шешімі шығу қажет.

Аталған айыптардың орынды екендігіне көз жеткізген Австрияның жоғарғы соты, жақын уақытта сот процесіне кіріспек. Оның нәтижесі бойынша Қазақстанда адам өлтіру, ұйымдасқан қылмыстық топ құру, заңсыз қаржы аударымдарымен айналысқан Рахат Әлиев өмір бойы бас бостандығынан айырылуы мүмкін. Сондықтан сот шешімі күшіне енген соң Австрия сақшылары оның қолына кісен салуды жоспарлап отыр. Бірақ Рахат Әлиевтің өзі Мальтаға қоныс аударғандықтан қайтадан халықаралық іздеу жариялануы мүмкін.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!