Павлодар облысында бүтін бір ауыл су астында қалуы мүмкін. Қазір қаладан ат шаптырым жердегі Мойылды елді-мекеніне апарар жалғыз жолды су шайған. Оқыс оқиға орын алған жерде күні-түні төтенше жағдай қызметкерлері жұмыс істеуде. Ал тұрғындар «баспанамызды су шайып кете ме» деп зәре-құты қашып отыр.
Алтын Ақтанова, Мойылды ауылының тұрғыны:
- Су тура қақпаға дейін жетті. Егер орамымыз біраз биік болмаса, алде басқа тағы су тасқыны болса, онда үйге дейін кіруші еді су.
Айтып келмейтін апат дәл мереке күндері Мойылды ауылының тұрғындарын абдыратып жіберді. Жылғалардан аққан су лезде ойпат жерде орналасқан ауылға жеткен. Төтенше жағдайлар қызметі 5 күннен бері толастамай жатқан суды сорғызып үлгермей жатыр. Тіпті ауылды ағын судан қорғайтын кіші-гірім бөгет те жасап қойыпты. Әзірге бұл судың қайдан келгені белгісіз. Себебі сайын даладағы омбы қар еритіндей ауа райы жылыған жоқ. Ертіс өзені де шалғайда. Мамандар жергілікті кәсіпорындардың бірі суларын ағызуы мүмкін дейді.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
