Ұлттық баскетбол қауымдастығының тұрақты чемпионатында кезекті турдың нәтижелері белгілі болды. Соның бірінде көптен бері жеңілістің ащы дәмін татпаған «Майами » 97: 101 есебімен «Чикаго Буллстен» ұтылды.
Қатарынан 27 матчта жеңіске жеткен «Майами» өкінішке орай «Лос-Анжелестің» осыдан қырық жыл бұрынғы рекордына жете алмады. Естеріңізге сала кетсек, 1971-72 жылдары «Лос -Анжелес» қатарынан 33 кездесуде жолы болған екен. Жеңімпаз атанған команда сапында 28 ұпай жинаған Луол Денг көзге түссе, «Майамидің» лидері Леброн Джеймстің есебінде 32 ұпай.
Британдық теннисші Энди Маррэй Майамидегі турнирдің жартылай сынына жолдама алды. Дәстүрлі жарысқа екінші нөмірмен терілген Маррэй ширек финалдық бәсекеде хорват Марин Чиличтен басым түсті.
Бір сағат 43 минутқа созылған бәсекедегі есеп 6:4 және 6:3. Британияның үздік теннисшісі жарыстың келесі кезеңінде француз Ришар Гаскемен кездеседі. Өз кезегінде Ришар Гаске бүгінгі ширек финалда чех Томаш Бердыхқа дес бермеді. Бір сағат 15 минутқа жалғасқан екі сеттегі бәсекеде 6:3 есебімен аяқталды. Екінші жартылай финалда испаниялық Давид Феррер мен неміс Томми Хаастың жолы түйіседі.
Футзалдан Еуропа чемпионатына іріктеу кезеңі аясында Қазақстан құрамасы екінші кездесуінде Латвияны 2:0 есебімен ұтты. Енді біздің команда ертең шешуші бәсекеде Румынияға қарсы ойнайды.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
