Алматыда бүгін ірі супермаркеттердің бірінде өрт шықты. Тал түсте тұтанған тілсіз жау бөлек тұрған екі қабатты қойма мен кеңсені түгел шарпыған. Лезде 400 шаршы метр аумаққа жайылып үлгерген жалынды толықтай сөндіру қас қарайғанша мүмкін болмады. Өрт басталған кезде аумақтан 50 жуық адам қауіпсіз жерге шығарылған. Оның бірнешеуі ысқа тұншығып қалыпты.

Тілсіз жау тұтанған аумақ Алматының қақ ортасында орналасқан. Оң қапталы да сол қапталыда тұнып тұрған тұрғын үйлер. Атын тәржімаласа “Астаналық” деп аталатын алып супермаркетте өрт шыққан кезде сауданың көркі қызып тұрған. Алғашында сауда орнында от тұтанды деп аптыққан ел арада сүт пісірім уақыт өткенде ғана ес жиды. Бұл аталған сауда үйінің қоймасы екен. Тонналаған тауар көзден таса жатқан жерде шыққан өрттің әп дегеннен алып аумаққа жайылып кеткені де содан дейді мамандар. 20-ға жуық өрт сөндіру көлігі келгенімен тілсіз жауды тез ауыздықтай алмады. Төтенше жағдайлар департаментінің қызметкерлері төтенше түрде өрт шыққан ғимараттан 30 газ баллонын алып шықты.

Жалаңдаған тілсіз жау алдын ала мәлімет бойынша 400 шаршы метрден астам аумақтың күлін көкке ұшырған. Ал, өртенген супермаркеттің қоймасы екенін ескерсек, шығынның да шаш етектен екені айтапаса да түсінікті. Дегенмен қаланың төтенше жағдайына басымен жауаптылар қас қарайғанша тілдей ақпар айтпады. Өрттің неден шыққаны да беймәлім. Ысқа уланған 3 адам жедел жәрдем дәрігерлерінің көмегіне жүгінген, оның екеуі  ауруханаға жеткізіліпті. Сауда орнының қапталындағы көшелерде қазір шақырымдаған көлік кептелістері пайда болды.

Алматының аспанын жарты тәулікке жуық торлаған қою қошқыл қара түтін міне кеш таяды әлі де сейілер емес. Тілсіз жау тұтанған аумақта қазір қалалық ТЖД қызметкерлері тайлы-тұяғымен қызмет қылуда. Өрттің аумағы қазір тәртіп сақшыларының толықтай бақылауында. Бұл жаққа қарыс қадам да аттап басу мүмкін емес.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!