Аргентинада әйгілі ралли «Дакар» басталды. Әлемнің түкпір-түкпірінен жиналған 400-ден астам автошабандоз кіл мықты көліктерді тізгіндеген. Олардың қатарында Қазақстандық команда да бар. Жарыстың алғашқы күнінде «Astana Motorsports»-тың жүк көлігін тізгіндеген шабандоздары 16-шы келсе, Айдын Рақымбаев бастаған жеңіл көлік доданы 19-шы орынмен аяқтады.
Аргентинаның Росарио порты жаңа жылдың алғашқы күні әдеттегідей халыққа лық толы, аяқ алып жүргісіз. Мұнда жер-жерлерден аузымен құс тістеген автоспорттың кілең дүлдүлдер жиналуда. Құм мен тау-тасты бағындырмас бұрын жарысушылар жаппай қан тапсыруы тиіс. Тіпті, жолда жазым бола қалса, сүйегін жеткізетін орынды да дайындалады.
Айдын Рақымбаев, «Astana Motorsports» командасының пилоты:
-Жаппай тексеру осы кабиналарда басталады. 30-ға жуық рұқсат қағаздарын жинауымыз қажет. Ол үшін бір жарым сағат кезекте тұрамыз.
Адамынан кейін көлік тексеріледі. Темір тұлпардан қылтанақтай да кемшілік шықпауы тиіс. Әйтпесе, жарыстан әп-сәтте-ақ шығып қаласыз. Әбден жетілдірілген көліктер апталап 3 бірдей мемлекеттің шекарасын кесіп өтіп, аса қауіпті жолдарымен жүреді.
Артур Ардавичус, «Astana Motorsports» командасының пилоты:
-Қазақстан атынан жүйіткейтін жүк көлігі осы. Тағы жол талғамайтын 3 көлік жолға шығады. Жарыста жеңуге бар күшті салуға тырысамыз.
Бұрқыраған шаңның арасымен Қазақстан командасы алға суырылып шықты. 400-дей көліктің ішінен біздің команда 16-шы орында келеді. «Татра»к тізгінін Артур Ардавичус ұстаған. Ал жеңіл көліктер санатында Айдын Рақымбаев пен Владимир Демьяненко бастаған экипаж 19-шы болып мәреге жетті. Әрине, бұл жарыстың басы ғана. Шабандоздарымызды алда әлі 8 мың шақырым қауіпті жол күтіп тұр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
