Петропавлда күзетте тұрған полицейді атқан адам шартты жазамен құтылды. Соттың бұл шешімі жәбірленуші тараптың наразылығын туғызуда. Кіші сержант сол оқиғадан кейін мүгедек болып қалғандықтан жұмысынан да айрылғалы отыр. Бұл аздай облыстық ішкі істер департаменті басшылығы оны қызметтік қаруға немқұрайлы қарағаны үшін де жауапқа тартпақ екен. 

Бұл тергеу барысында түсірілген кадрлар. Жалпы қызмет бабындағы полицейге шабуыл былтыр маусым айында жасалыпты.

-Оқиға таңғы сағат үш кезінде мына Жеңіс саябағында болған. Күзетте тұрған танысына келген айыпталушы онымен сөзге келіп қалады. Екі жігіттің арасында кикілжің төбелеске ұласады. Оның барысында түнгі қонақ тәртіп сақшысының тапаншасын тартып алып, шүріппені басып қалған. Күдікті сол күні-ақ тапаншамен қалада ұсталды.

Алайда тергеу барысында айыпталушы Айбек Ғазиз кінәсін мойындаған жоқ Айтуынша, ешқандай төбелес болмаған, ал тапаншаны қызық көріп ұстаған.   

- Тапшаны өз еркімен берді ма?

- Иә

Содан қаруды иесіне қайтара бергенде тапанша өзінен өзі атылған көрінеді. Бірақ мұның барлығын жәбірленушінің өзі жоққа шығарып отыр. Тахир Рыспековтың айтуынша, танысы қарызын қайтармас үшін оны әдейі атыпты. Оқ жігіттің өкпесі мен жүрегін жанай өткен. Соқталдай жігіт енді сегіз ай бойы емделіп жүр. Ал сот бүгін айыпталушыны «адамды жазатайым жаралады» деп екі жарым жыл шартты мерзім кесті.

Тахир Рыспеков, СҚО ІІД қызметкері:

-Ол тәртіп сақшысын қызмет бабында жаралап, оқиға орнынан қашып кетті. Кейін менің қызметтік қаруыммен ұсталды. Солай бола тұра сот  шартты түрде жазалады. Әрине, мен мұнымен келіспеймін. Мүгедек болып, қызметке де жармай қалдым. Ертең жұмыстан кетсем, тіпті жүк тасушы болып та күн көре алмайтыным анық.  

Бұл аздай Ішкі істер департаментінің басшылығы қаруына немқұрайлы қарағаны үшін Тахир Рыспековты қылмыстық жазаға тарту керек деп шешіпті. Жығылған үстіне жұдырық алған жігіт енді облыстық соттың төрелігіне жүгінгелі отыр.  

Бізді Youtubе-та қараңыз! Бізді Facebook-та, Instagram-да, Telegram-да оқыңыз!