Бұл жолы екі бүлдіршінмен далада отырған әйел тұрғындардың үйіне түнеуге рұқсат сұрап кіріп, балаларын тастап із суытқан. Қазір 2 және 1 жасар бөбектерінен бас тартқан безбүйрек ана мен туыстары іздестіріліп жатыр. Ал, Гүлмира және Нарғыз есімді қыздардың өздері ауруханаға жатқызылды.
Тастанды бүлдіршіндерді үш күн үйінде баққан Айсұлу Тәжібаева «бәрі түсімдегідей болды» дейді. Есік алдында отырған кір-қожалақ қос баласы бар әйелді көріп, жөн сұрағанда ол баратын жері жоқ екенін айтып зар жылапты. Жаны ашыған Айсұлу бейтаныс әйелді үйіне кіргізген.
Айсұлу Тәжібаева, Шымкент қаласының тұрғыны:
-Үстінде курткасы жоқ, біреуінің курткасы бар біреуінікі жоқ. Сөйтіп алып кірдім. Алып кіргенде шықтым да, үйіңе қайтпайсың ба дедім. Сөйтіп айтты баратын жерім жоқ, күйеуім арақ ішеді, ішіп ұрып садақа сұратады деп айтты да.
Айсұлудың айтуынша, бейтаныс әйелдің бет-аузы көгала қойдай көгерген. Өзін-өзі ұстауы да күдік тудырыпты. Тіпті, балаларының жасын да жарытып айта алмаған. Түнеп шыққан соң, қос қызын тастап, таң атпай кетіп қалыпты. Гүлмира мен Нарғыздың анасын 3 күн күткен әйел ақыры полиция шақырған. Қос бүлдіршін қазір балалар ауруханасында жатыр.
Ғазиза Қожабекова, педиатр:
-Әрине кішкентайы Наргиза кішкентай болғаннан кейін қолға ұстағанды жақсы көреді. Қолға әбден үйренген. Үйдің баласы екені көрініп тұр. Үлкені сөйлейді. Әпше дейді бізге. Енді өзінің несі жайында ешқандай хабары жоқ.
Бір жас пен екіден енді асқан қос қызға аздап суық тиген екен. Дегенмен, дәрігерлер алаңдауға еш негіз жоқ деп отыр. Айта кетсек, бұл жаңа жылда Шымкентте тіркеліп отырған екінші оқиға. Керемет, Мирас пен Кәусар есімді бүлдіршіндерді анасы тастап кеткенін жуырда ғана айтқан болатынбыз. Қазір, енді олардың қатарына Гүлмира мен Нарғыз қосылды.
-Табалдырықтан енді аттаған жылқы жылы Шымкенттік бөбектер үшін қуанышты болмай тұр. Туған әке-шешесінен тірідей айрылғандардың саны бір аптада бесеуге жетті. Қазір, екі жәйт бойынша да іс қозғалып, полиция балаларын тірідей жетім қылған ата-аналарды іздестіріп жатыр. Гүлмира мен Нарғыздың әкесі туралы мәлімет ішкі істер өкілдерінде бар екен. Тек, әкесі ішкілікке салынған көрінеді. Сондықтан, анасы табылмаса оларды жуық арада бөбектер үйіне өткізбекші.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
