Алғашқы үзіліске дейін алаң иелерімен терезесі тең ойын көрсеткен астаналықтар, екінші кезеңде төрт шайба жіберіп алды. Осыдан кейін салы суға кеткен «Барыс» кездесудің үшінші бөлігінде тағы екі рет ойынды ортадан бастауға мәжбүр болды.  Не керек сырт алаңдағы сериядан  мүмкін болған он екі ұпайдан тек алтауын  иемденіп қайтқан  «Барысты» енді Астана мұз айдынында күтеміз.  Өз алаңындағы серияның алғашқы ойынын Ари-Пекка Селиннің шәкірттері  14-қаңтар күні Мәскеудің «Спартагымен» өткізеді.

Германияның Рупольдингінде биатлоннан  әлем кубогы үшін жарыстың бесінші кезеңі жалғасын табуда. Эстафетадан сынға түскен ерлер додасында Аустрия құрамасы  өзгелерге дес бермеді.   Кристоф Зуман, Даниэль Мезотич, Симон Эдер және  Доминик Ландертингер төрттігі, эстафеталық сынақта  Аустрияның  мықты екенін танытты. 

Алтын жүлде арманға айналған Германия құрамасы бүгінгі  эстафетада бас жүлдеге бір табан жетпей тоқтады. Кристоф Штефан, Андреас Бирнбахер, Эрик Лессер және Симон Шемп квартеті күміс медальды місе тұтты. Тұғырдың үшінші сатысына Ресей құрамасы көтерілді. Сапында Ян Савицкий, Сергей Наумик, Александр Трифонов, Антон Пантов өнер көрсеткен Қазақстан құрамасы Рупольдингте  15 орынды иеленді. Біздің биатлоншылар  жеңімпаз атанған Аустрия құрамасына бақандай  5 минут 10 секунд ұтылды. 

Футболдан Кот д`Ивуар құрамасының жартылай қорғаушысы Яя Туре Африка құрлығының үздік футболшысы атанды. “Манчестер Сити” ойыншысы бұл мәртебелі атаққа осымен үшінші жыл қатарынан лайық деп танылған.

Дауыс беру нәтижесінде ол нигериялық Джон Оби Микел мен отандасы Дидье Дрогбаны басып озды. “Челси” жартылай қорғаушысы Оби Микелмен салыстырғанда,  Туре “Манчестер Ситимен” командалық турнирда жеңіске жеткен жоқ. Десе де көпшілік оның жеке шеберлігін жоғары бағалапты. Осымен үшінші рет “Қара Құрлықтың” үздігі атанған Яя Туре бұл көрсеткіш бойынша Ганалық Абеди Пелемен теңесті. Ал рекорд Африка футболының тағы бір жұлдызы Самуэль Это`О-ға тиесілі. Ол мәртебелі атақты төрт рет алған

Мадридттық “Реал” Карольдік Кубокының 1/8 финалы аясында өз алаңында “Осасунаны” ұтты.

Алғашқы минуттан ширақ ойнаған алаң иелері 19-шы минутта есеп ашты. Айып добына бірінші жеткен Карим Бензема болатын. Үзіліске дейін таблодағы есеп өзгерген жоқ. Алайда екінші таймның ортасында мадридттық футболшылар өз жанкүйерлерін тағы бір желпіндіріп тастады. “Осасуна” қорғаушыларының бірі өрескел қателікке бой алдырған. Ал мұндай мүмкіндікті құр жібермейтін “Реал” есепті еселеп кетті. Гол авторы Хесе Родригес.     

Бізді Youtubе-та қараңыз! Бізді Facebook-та, Instagram-да, Telegram-да оқыңыз!