1 млд теңгеге салынған мектепте жылу жоқ
Астанада саршұнақ аязда бүтіндей бір мектеп жылусыз қалды. Кезінде білім ошағын тұрғызуға бюджеттен 1 млрд бөлінген. Алайда қаржы жылу қазандығын салуға жетпей қалыпты. Енді оның зардабын мыңнан астам оқушы тартып отыр. Ұл-қыз сабақ үстінде бүрсең қағып сыртқы киіммен отыруға мәжбүр. Балаларының денсаулығына алаңдаған ата-аналар бүгін білім ордасына келіп шу шығарды.
Автор: Гүлнұр Имандос
10.01.2014
–Қазір суық қой мектеп.
- Жоқ енді суық болғанда, жасалады
-Қашан жасалады?
- Қазандықтағы суды сорғызып жатырмыз.
Осылайша ата-аналар «мектеп суық» деп директорға дүрсе қоя берді. Алайда басшы бар кінәні білім ошағын тұрғызған құрылысшыларға жаба салды.
Жәкенбай Шәріпхан, мектеп директоры:
- Жұмыстарды толық аяқтамаған, әсіресе, мынау терезелерді жылылау, ең негізгі мәселе, котельныйдан жылу дұрыс тартылмаған.
Мектепке жылу жақын маңдағы құрылысы аяқталмай қалған балабақша қазандығынан беріліп отыр. Бірақ оның қысымы аз. Соңғы 3 жылдан бері балалар осылай қара суықта сабақ оқуға мәжбүр.
Бақыт Махметова, Астана қаласының тұрғыны:
- Мен жібергім келмейді, балаларымды мектепке. Өйткені, 1 ай барады, 1 ай ауырады, кіріңіздер өздеріңіз көресіздер.
Мектеп ішін толық аралауға мүмкіндік болмады. Тілшілерді ғимарат ішіне кіргізгісі келмеген директор бар ашуын дәлізде жүрген ұл-қыздан алды. Сынып ішінде сырт киіммен отырған оқушыларды күртешелерін шештіріп тастаған. Ал директордың «құпиясын» балалар айтып салды.
-Қатты тоңып қалдым.
- Күртешемен отырамыз.
Астанадағы Көктал кентінде орналасқан бұл №68 мектептің саршұнақ аязда тоңып отырғанын шенеуніктер жақсы біледі. Бірақ құрылысқа деп бюджеттен бөлінген 1 млрд теңгенің қалайша жылу қазандығына жетпей қалғаны түсініксіз. Тек оны тексеріп жатқан ешкім жоқ.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
