Мылтық асынған шаңғышылар  Әлем кубогының тағы бір кезеңін  артқа тастады.  Рупольдингтегі бесінші кезеңнің соңғы  күні биатлоншылар қуалай жарысудан сынға түсті.

Ерлер додасында Норвегия құрамасының лидері  Эмиль Хегле Свендсен  топ жарды. Жекелей сынның нәтижесі бойынша жарыс жолына бірінші аттанған Свендесен сол кеткенннен ешкімге  жеткізбеді. Словениялық Яков Фак  мәре сызығын екінші кессе,  қола жүлде ресейлік Евгений Гараничевке бұйырды. Жерлестеріміз Антон Пантов пен Ян Савицкий 50-ші және 51 –орындардан табылды.  Әйелдер бәсекесінде  чехиялық Габриэла Соукалова үздік шықты. Оның ізін ала жеткен  норвегиялық Тора Бергер мен фин Кайса Макарайнен  екінші және үшінші орындарды бөлісті. Ванкувер олимпиадасында күміспен күптелген жерлесміз  Елена Хрусталева  47- орынды иеленді.  

Еліміздің футбол клубтары жаңа маусым алдындағы оқу-жаттығу жиындарына кірісіп кетті. Жылы жақты жағалап жүрген  клубтарымыз, жиын аясында  жолдастық матчтарға да көбірек көңіл бөлуде.

Түркияда дайындалып жатқан Шымкенттің «Ордабасы»,  Қытайдың  белді клубтарынан бірінен саналатын  «Шанхай Шэньхуамен» күш сынасты. Аспанасты елінің  Суперлигасында ойнайтын команданы аргентиналық маман Серхио Батиста жаттықтырады. 2012-2013 жылдары Шанхайлық клуб сапында  Дидье Дрогба мен  Николя Анелька сынды аяқдоп жұлдыздары өнер көрсеткен. Екі команда арасындағы жолдастық матч 2:1есебімен  шымкенттік футболшылардың жеңісімен аяқталды. Алғашқы допты Мардан Төлебек соқса,  екінші гол  Эдин Юнусовичтің есебінде.  

Англия премьер лигасына кезек берсек, мұнда көш басындағы жағдай ушығып тұр. 21- турдың нәтижесі онсыз да күрделенген мәселені одан бетер өршітіп жіберді.  «Халл-Ситиді» ұтқан «Челси»  көш басында  бір сөтке де тұрақтамады. Керуен тізгінін  сырт алаңда «Ньюкаслды» жеңген «Манчестер Сити »  ұстады.

Осы турдағы ең нәтижелі ойын  «Сток-Сити» мен « Ливерпуль» арасындағы бәсекеде тіркелді. Бұл ойын 3:5 есебімен «Ливерпульдің» пайдасына шешілді.  Биылғы жыл   тепкен добы қақпадан табылып жүрген Суарес, бұл жолы да  жасыл  алаңнан құр кеткен жоқ. Ол «Сток-Ситидің» қақпашысын екі рет қапы қалдырды.  Жеңілістен көз аша алмай келген «Манчестер Юнайтед» сәтсіз серияларға нүкте қойғандай. Әйгілі клуб «Олд Тарффорд »  стадионында  «Суонсидің» қақпасына жауапсыз қос доп соқты. Не керек Англия премьер лигасында  көш тізгіні үшін талас қызып тұр. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!