Бүгін Ішкі Істер министрлігі Мәжіліске тұтас көшіп келгендей. Еліміздің бас полицейі бастаған шенділер бір-бір орынға жайғасқан. Әрине, үдере келуге себеп те жоқ емес. Министр талай отбасын шырылдатқан Шу даласындағы қарасора өсетін алқапты жермен-жексен етпек.

Қалмұханбет Қасымов, ҚР Ішкі Істер министрі:

Шу алқабының проблемасын тез арада шешуіміз керек. Әрине, 140 мың гектар жерді қоршап тастау мүмкін емес. Алайда, одан таралатын есірткі барлық жерге кетіп жатыр. Мұны шешудің екі жолы бар:  Бірі - алқаптың көзін құрту, екіншісі – ол жерді шаруашылықта пайдалану.

Шу даласымен күресе алмай отырған министрге депутаттар ақыл-кеңестерін аяған жоқ. Мәселен, Дариға Назарбаева алқапты фармацевтикалық ұйымдардың қарамағына беріп, ол жерге зауыт салуды ұсынды. Өйткені, шетелден млндаған қаржыға сатып алынатын психотропты дәрі-дәрмектерді осында өсетін қарасорадан-ақ дайындауға болады екен. Бұл есірткі шөбінен жасалатын препараттар бүгінде Израильде, Канада мен Еуропа елдерінде қатерлі ісікке қарсы кеңінен қолданылып жүр.

Дариға Назарбаева, Мәжіліс депутаты: 

- Көкнәрді медицинада пайдалануға болады. Одан кезінде май жасаған, 25 мың түрлі өнімді шығаруға болады. Онымен күресудің орнына оны басқаруға беріп, зауыттарды салып, осы көкнәрді адамдардың пайдасына жасауға мүмкіншілік бар.

Өкініштісі, Шу даласынан жайылған есірткі контрабандасы 2 есеге өсіп кеткен. Алайда, министр нашақорларды даладан емес, қаладан іздеуге кіріспек. Ол мемлекеттік қызметкерлердің бәрін жұмысқа аларда жаппай «тесттен өткізу керек» деп санайды. Мұндай тексеруге оқушылар мен студенттер де ілінбек.

Қалмұханбет Қасымов, Ішкі істер министрі:

-Бұл жерде оқушылар мен студенттерді міндетті немесе ерікті түрде тестілеуден өткізуді енгізу туралы айтып отырмыз. Олармен бірге мемлекеттік қызметшілерді жұмысқа қабылдау кезінде міндетті тестілеуді енгізу мәселесін де, қарауымыз керек.

-Айта кетсек, елімізде 40 мыңнан астам адам есірткіге тәуелді. Олардың басым бөлігі әйелдер екен. Депутаттар нашақорларды емдейтін дәрілер Шу даласындағы шөптен жасалса, бұл «статистика әлдеқайда төмендейді» деген сенімде. Ал министр Қасымовтың мемлекеттік қызметкерлерді жаппай «тестен өткізу керек» деген ұсынысы біраз депутаттың қолдауынсыз қалды.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!