-70 жылдығын  тойлаймыз  деп туыстарды шақырып қойғанбыз. Соңында осындай жағдайға душар болып отырмыз. 

Мерейтойды тойлау бақыты бұйырмады. Жақсылық Ақпанов дәл туылған күні жер қойнына тапсырылды. Марқұм теміржол саласының құрметті ардагері. Ұзақ жылдар бойы жолсерік болып істеген. Ал дәл осы жерде көліктің астына түсті. Жаяу жүргіншілер жолағымен өте бергенде, зейнеткерді қатты жылдамдықпен келген шетелдік машина соққан. Кейін рөлде 24 жастағы Астанадағы аудандық прокурордың көмекшісі Мақсат Шыңғысовтың отырғаны анықталды. Жас жігіт адамды басқанымен қоймай оқиға орнынан қашып кеткен.

-Қымбат көлікті тақымдаған прокурор далада қансырап жатқан қарияға көмек көрсетуге де жарамаған. Ал шамамен 200 метр жерде  теміржол ауруханасы бар екен. Егер зардап шегушіге шұғыл дәрігерлік көмек көрсетілгенде, оны аман-алып қалуға әбден болар еді.

Кездейсоқ адамдар жедел-жәрдем шақыртқанымен ішкі құрылысы түгел зақымданған Жақсылық Ақпанов операция үстелінде көз жұмды. Ал кінәлі жүргізуші кешірім сұрауға да жарамаған.  Тек араға әкесін салып істі жабуға жанталасып жатқанға ұқсайды. 

Рауза Жұмағалиева, марқұмның жұбайы:

-Куәгерлер болды. Әкесі  үлкен жерде істейтін болуы керек бәрін алып тастап жауып тастап отыр. Баласын отырғызысы келмейді. Менің жалғыз ұлым дейді, мен оның түрмеге түскенін қаламаймын дейді. Сонда ол қалай болады? Кісі өлтіреді кетеді, жауапқа тартылмай ма? Жауапқа тартылуы керек.

Жауапқа тартылмақ түгілі, Жақсылық Ақпановтың өзі айыпты болатын түрі бар. Себебі ереже бұзып жолды белгіленбеген жерден кесіп өткен көрінеді. Марқұмның туыстары бұл лауазымды қызметкердің жауапкершіліктен жалтару  үшін ойлап тапқаны дейді. Анығы оған қатысты  қылмыстық іс қозғалған.

София Қылышбекова, Астана қалалық ІІД баспасөз қызметінің жетекшісі:  

-Жаяу жүргіншіні басып кеткен жүргізуші анықталып ұсталды. Қаамауға алынды. Изоляторға жабылды.

Бір қызығы, кейін қолхатпен бостандыққа жіберілген. Ал арқа сүйер азаматынан айырылған отбасы құрығы ұзын прокурор  «жазадан сытылып кете ма?»- деп алаңдап отыр. 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!