Ұтымды сәттер жиі болғанымен  бірінші кезеңде екі жақтың да қорғаныс шебі сыр бере қоймады. Дегенмен бүгінгі ойындағы  алғашқы голды қонақтар салып кетті.  Араға алты минут салып таразы басын теңестірген «Барыс» ,  шабуылды одан әрі үдете түсетіндей көрінген. Бірақ осы тур алдын  плей-офф мәселесін шешіп алған жерлестеріміз  бұл жолы босаңдық  танытты. Нәтижесінде кездесудің шешуші бөлігінде  жауапсыз қос гол соққан  «Медвешчак»  Астанадан олжалы қайтты. Әзірге «Барыс» турнир кестесінде екінші орынға жайғасса, Шығыс конференцияның тізгінін  Магнитогрскінің «Металлургі» ұстады.  Ертең астаналық хоккейшілер өз алаңында Донецкінің  «Донбассын» қабылдайды.  

Қазақстандық кәсіпқой боксшы  Бейбіт Шүменов пен  америкалық Бернард Хопкинс арасындағы жекпе-жек 29-шы наурыз күні  Бруклинде өтетіні белгілі болды. Бұл жөнінде АҚШ-тың  Голден Бой проумотерлік компаниясының директоры Ричард Шафер мәлімдеді.

49-жастағы Бернард Хопкинс жартылай ауыр салмақ дәрежесі бойынша Халықаралық бокс федерациясының чемпионы. «Жыл қазағы» атанған Бейбіт, Дүниежүзілік бокс қауымдастығы версиясының  суперчемпионы болып табылады.  Енді қос чемпион  жартылай ауыр салмақ категориясы бойынша  кімнің мықты екенін анықтау үшін біріктірілген жекпе-жек өткізуге бел буып отыр. Көктемнің алғашқы айында өтетін суперматч көрсетілімін  Showtime телеканалы таратады.  

«Барселона » Испания кубогының ширек финалына жолдама алды.   Өз алаңында   «Хетафенің» қақпасына жауапсыз төрт гол тоғытқан  каталондықтар ,   қарымта матчта да дес бермеді.

Екінші матчта  «Хетафенің» қорғаушылары  аргентиналық шабуылшы Лионель Мессиге тосқауыл болып жарытпады. Алдымен  сол қанаттан басталған шаубылға аяғын тоса қалған  Месси,  жақын жерден мүлт кетпеді. Оның орындауындағы  екінші голға командалас әріптестерінің көмегі де қажет болған жоқ. Алдынан шыққан қорғаушыларды  бірінен соң бірін алдап өткен Месси, аладопты қақпаға домалатып кете барды. Алдағы ширек сында «Барселона»  «Левантемен» кездеседі.

Бізді Youtubе-та қараңыз! Бізді Facebook-та, Instagram-да, Telegram-да оқыңыз!