Бірнеше отбасы құлағалы тұрған үйді паналап отыр
Атырау облысының Құлсары қаласында бір топ отбасы жартылай бұзылған үйлерде жан бағып жүр. Жергілікті әкімдік апатты үйден жаңасына көшіруге уәде еткен екен. Бірақ талай жылдан бері сөз жүзінде қалып келеді. Оның үстіне тұрғындардың қолындағы келісім-шартта құрылыстың қашан басталатыны да айтылмаған. Күдерін үзген жұрттың көбі көшіп кетіпті. Ал барар жер, басар тауы жоқ 9 жанұяға жандарын шүберекке түйіп отыр.
Автор: Жанар Низамутдинова
17.01.2014
Құлсарыдағы екі қабатты осындай 8 үй апатты деп танылыпты. Есік-терезесі жұлынып, кейбірінің қабырғалары қақырап тұр. Жергілікті әкімдік мұндағы тұрғындар уақытша баспанаға қоныс аударды дегенімен, бұзылған үйді паналап жүргендері әлі бар. Тұруға жарамсыз болған соң су, жарық пен газдан ажыратылған екен. Мұндағы тұрғындардың көбі әлдеқашан қоныс аударған. Ал барар жер басар тауы жоқ 9 отбасы әлі осылай жұртта отыр.
Жасұлан Сейітмағанбетов, Құлсары қаласының тұрғыны
-Газыңды қиям, светіңді қиям деп үпір-түпір көшіріп жіберді. Мен әлі толықтай көшкенім жоқ. Үйімнің кілті бар. Әлі тұрмын осы жерде. Светін, газын төлеп тұрмын әлі. Нағыз болмаса, бір айдан кейін қайтып келемін, ремонттаймын да.
Ал аудан басшылары бұл ескілерінің орнына жаңасын салмақшы екен. Құжаттарының барлығын дайындап қойған. Жоспарға сәйкес, Құлсарыда 60 пәтерлік 5 үй тұрғызылмақ. Ол үшін апатты үйлердің барлығы сүріліп бітуі тиіс. Бірақ ондағы 9 отбасы алдымен жаңа пәтер берілмейінше қозғалмаймыз деп отыр.
Шәкір Кейкин, Құлсары қаласының әкімі:
-Тұрғындардың енді дұрыс түсіністікпен қарауын сұраймыз. Олар ескі үйінің орнына дәл осындай көлемдегі, дәл сондай бөлмелі жаңа үй алатынына сену керек деп есептеймін. Себебі, бұл бағдарлама облыстың да, республиканың да қадағалауында тұр ғой.
Жаңа тұрғын үйдің құрылысы өткен жылдың шілдесінде басталады делінгенмен, оның жұмысы әлі сағызша созылып келеді. Тіпті тендер де әлі өткізілмеген. Дегенмен әкімдік құрылысты ақпан айынан қалдырмай бастап, жыл соңына дейін кілттерін табыстаймыз деп отыр. Тек оған тұрғындардың сенгісі жоқ. Үйді сүрмес бұрын әкімдік қағаз жүзінде кепілдік берсін деп талап етуде.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
