Киевтің жаппай ереуілдерден кейінгі келбеті бұл. Қаланың қайсы бұрышына барса да атылған оқ, жарылған суық қару, талқан болған көшелер мен жанын шүберекке түйіп қан-жоса боп тізерлеген адамдардан аяқ алып жүру мүмкін емес. Алаңдағы оппозиция жақтастары түн ортасында Үкімет пен Парламент үйіне беттегенде, милиция тосқауыл болған. Ақыры тараптар жаппай жаға жыртысып тынды.

Украиналықтар бірнеше жылдан бері Еуроодақпен етене араласуға ынтық. Осыған орай басталған келіссөздер өткен жылдың соңында шорт тоқтағанда ел бір толқып алған. Бірақ жұрт етек-жеңін жинап болмастан Украина билігі митингтер мен басқосуларды алаңдарда өткізгендерді қатаң жазалау туралы заң жобасын қабылдап жіберді.

235 – жақтады. Заң қабылданды.

Дәл осы заң жобасы жұрттың шымбайына тиген, алаңға шығуға қатаң тыйым салып құлақ аспағандарды қамайтыны адам құқығын шектеу дейді түнгі төбелестің белсенділері. Мұның барлығы отқа май құйғандай лап етіп, биліктің серкелеріне қолы жетпеген жұрт сарбаздарды сабауға көшті.Сарбаздар да қалыс қалып жатқан жоқ, таңға жуық шерушілерді шетінен ата бастаған. Жалпы жапа шеккендер саны жүздеп саналады. Белгілі боксер, соңғы кездері саясат серкесіне айналған Виталий Кличкода жетті мұнда. Билікке нақты талаптар тастады ол.

Виталий Кличко, “Удар” партиясының жетекшісі:

-Тығырықтан шығудың жалғыз жолы қазіргі биліктің отставкаға кету. Мерзімінен бұрын президент және парламент сайлауын өткізу қажет. Шенеуніктер арттарын ойлап тәуекелге бармаса Каддафи мен Чаушескудің тағдарын қайталайды.

Дегенмен оппозиция серкелері кеше түнде басталған қарулы қақтығыста қатыстары жоғын мәлімдеді. Қазір де ереуіл тоқтар емес, қолда бар ақпараттарға сүйенсек алаңға Киевтегі оқу орындарының студенттері мен елдің өзге түкпірінен мыңдаған жұрт жиналуда. Ал АҚШ пен Еуроодақ тараптарды қантөгіске жол бермеуге шақырды. Мәселені бейбіт шешпесе Украина билігіне қарсы санкциялар қойылуы да мүмкін.
 

Бізді Youtubе-та қараңыз! Бізді Facebook-та, Instagram-да, Telegram-да оқыңыз!