Жұмысшылар басшылары отырған кеңсеге басып кірді
Алматы облысында жалақы көрмеген жұмысшылар көк тиынсыз далада қаңғырып қалды. Қала іргесіндегі қиыршық тас және шығарумен айналысатын компания қызметкерлеріне айлап ақы төлемеген. Сұрап барғандарын өтірік уәдемен алдаса, кейін тіпті сөйлесуді қойыпты. Оған қоса, жүздеген қызметкердің зейнетақы қорларына да жылдап бір тиын түспегені анықталып отыр. Шыдамы шегіне жеткен жұрт бүгін басшылары отырған кеңсеге басып кірді.
Автор: Нартай Аралбайұлы
21.01.2014
-Біздің қолымыздан не келеді? Осылай жұмысқа шықпай тұрамыз осы жерде қайыр тілегендей болып.
Айлап айлық алмаған ел осылайша қарындарының ашқанына да, қадірлерінің қашқанына да наразы. Тас-құм өңдеумен айналысқан жұмысшылар 3 айдан бері жалақы көрмеген. Еститіндері күнде ертең деген ертегі. Қаржыдан қысылып, несие алуға барғандарында зейнетақы қорларына жылдап көк тиын аударылмағанына көздері жеткен.
Еркебұлан Темірбеков, жұмысшы:
-Менің осы жерде істегеніме 2 жыл болды. Екі жылдан бері осылай 2-3 ай жалақы кешіктіреді. 2 жыл істегелі менің зейнетақы қорыма бір-ақ ай аударған.Жартысын, 9 мың теңге ғана аударған.Кеше ереуілге шықтық бүгін береміз деді. Бүгін тұрмыз таңнан суықта. Жұмыс істейміз бірақ ақша бермейді бұл не деген сұмдық?
Айына 60-70 тонна тасты өңдеп шығаратын ұжымның қызметтен қалт кеткен кезі жоқ. Ал еңбегінің ақысын сұрағандарды басшылық босаға аттап бастырмайды екен. Шыдамдары шегіне жеткен жұмысшылар бүгін бас кеңсеге басып кірді.
-Ашсаңыздаршы аға есікті, адам құсап жауап бермей ме бізге?
- Біз мал емеспіз, қой сияқты айдай беретін.
-Бізге ақша керек бәріміздің отбасымыз бар.
Кеңселеріндетығылумен тірліктері тынбаған соң жауаптылардың кейбірі төбе көрсетті. Ақталып жатпады, айыптарын мойындады. «Төлейміз» деп ант-су ішті.
Нұрлан Құлмағанбетов, “Тас-Құм” АҚ учаске бастығы:
-Оның бәрі рас, бірақ аударылып жатыр, ол туралы жұмыс істеліп жатыр. Жалақы бүгін беріледі, шотқа жаңа ақша түсті, қазір 2 сағатта беріледі.Зейнетақы қоры жайлы мәселе осы наурыз айына дейін шешіледі. Бұған дейінгі қарыздың барлығы беріледі деп жоспарлап отырмыз.
«Жаздық жаңылдық» деген басшылықтың сөзіне ел иланбады ақыры. Кейбірі есеп-қисабын түгендеп алып, бұл жерден іргесін аулақ салуға да қамдануда.
«Тас-Құмда» талай жыл талмай табандап еңбек етіп алайда табанақы майдай тер жалақылары жетпей жарымаған жұмысшылар міне екінші тәулік болды жұмысқа шығудан түбегейлі бас тартып отыр. Тіптен «қызметсіз қаңғып қаласыңдар» деген басшылардың қоқан-лоқысында елемейтін болған ел. Жұрттың бел кеткенше беріспесін ұққан басшылар жалақыны толық төлеп беруге уәде етті.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
