Ет бағасы арзандауы мүмкін
Солтүстіктің фермерлері шарықтаған ет бағасына қарсы бірлесе күреспек. Ол үшін қолдағы мал басын асылдандырып, шетелден ірі қараның тектісі сатып алынып жатыр. Енді бағаны қолдан қойып жүрген алыпсатарлардың аз да болса тынысы тарылып, оларға лайықты бәсекелес табылды. Жолдауда да осы мәселе көтерілген. Атап айтсақ, президент елімізге сырттан ет әкелуді қойып, керісінше, экспорттың әуелетін арттыруымыз қажет деген еді.
Автор: Гүлмира Тасболатқызы
22.01.2014
Мына шаруашылық жарты жыл бұрын Симменталь деп аталатын асыл тұқымды 160 ірі қара сатып алыпты. Сиырлардың әрқайсысы 240 мың теңге тұрады екен. Қора-қопсы салып, мал сатып алуға 50 млн теңге жұмсалған. Оның жартысын мемлекет «Сыбаға» бағдарламасымен қаржыландырып отыр.Бұл сиырлар жем-шөпті жергілікті ірі қаралармен бірдей жесе де, етті екі есе артық береді. Бұзауларының өзі айналасы бір жарым жылда 400-450 келіге дейін салмақ қосады. Өңірде мал басын асылдандыруға бағытталған осы бастама базардағы бағаға әсер етіп, еттің құны едәуір арзандаған.
Науан Дауренбеков, шаруа қожалығының басшысы:
-Осыдан екі жыл бұрын бір келі еттің көтерме бағасы 900 теңге болатын. Қазір ол 700-ге дейін түсті. Өйткені мал шаруашылығын дамытып жатқан кәсіпкерлердің қарасы көбейді. Ал базардағы еттің қымбаттығына ең алдымен алыпсатарлар кінәлі.
Әрине, шетелден мал сатып алуда қателіктер де болды. Өткен жылы ғана Австриядан әкелінген мың бас сиырдан Шмалленберг дерті табылып, түгелінің көзі толық жойылған еді. Алайда бұл жағдай мал бағып күн көремін деген кәсіпкерлердің бетін қайтарған жоқ. Керісінше, шетелден мал таңдауда абай болуы үйреткен.
Өмірбай Омаров, Қызылжар аудандық ауыл шаруашылығы бөлімінің бастығы:
-Елбасы қойғандай біз етті сырттан емес өзіміздің ішімізден, қайта сол сыртқа шығаруға жұмыс жасау керек деп айтқан болатын. Биылғы жолдауда соны тағы да нығыздап айтты. Біздің аудандағы ауыл шарушалығы құрылымдары осы бағытта үлкен жұмыстар жүргізіп жатыр.
Өңірге шетелден мал тасу шарасы 2007 жылы басталыпты. Бүгінде осының арқасында аймақтағы әрбір бесінші ірі қара асыл тұқымды болып отыр.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
