«Рысқалиев ісіне» қатысты сот Рысқалиевсіз басталды
Бүгін Атырауда облыстың бұрынғы әкімі Бергей Рысқалиевтің қылмыстық тобына қатысты сот басталды. Тек айыпталушы орындығында облыстың экс-әкімі емес, оның 22 сыбайласы. Оларға экономикалық және жемқорлық қылмыстар жасады деген кінә тағылып отыр. Қатарында экс-әкімнің бұрынғы орынбасарлары Болат Дәукенов пен Асқар Әбдіров және қазір қамауда отырған Атырау қаласының бұрынғы әкімі Асқар Керімов бар. Ал осы атышулы қылмыстық істің басты кейіпкерлері ағайынды Бергей мен Аманжан Рысқали әлі халықаралық іздеуде жүр.
Автор: Жанар Низамутдин
23.01.2014
Таңғы онда басталған сот процесіне келгендердің барлығын ішке жіті тексеріп кіргізіп жатыр. Атышулы процесті өткізуге қуықтай ғана бөлме берілген екен. Сондықтан жұртқа сығылысып отыруға тура келді. Жалпы айыпталушы орындығында 22 адам. Атырау облысы әкімінің бұрынғы екі орынбасары, қала әкімі бастаған өңшең белгілі кәсіпкерлер. Барлығына бүгін мемлекеттік айыптаушылар қандай баптар бойынша кінә тағылғанын түсіндіріп, жеке бастарына тағы бір мәрте тоқталып шықты.
Болат Даукенов:
- Тұтқындалғанға дейінгі жұмыс орныңыз?
- Атырау облысы әкімінің бірінші орынбасары
- Тұтқында қай уақыттан бері отырсыз?
- 2012 жылдың 12 қыркүйегінен бері
Іске қатысып отырған мемлекеттік айыптаушының саны екеу ғана. Есесіне айыпталушылардың адвокаттарының ұзын-саны 19-ға жетіп жығылады. Олардың біразы бүгін отырыс басталмай жатып, істі атыраулық судьялардың қарауына ашық қарсылық білдірді.
Тагир Сейсенбаев, адвокат :
- Қорғауымыздағы азаматтар Атырау облысындағы судьялардың әділ шешім шығаратына күманданып отыр. Сондықтан бүгінгі судьяға сенімсіздік білдіріп, ауыстырылуын талап етеміз.
Бірақ, жарты сағаттай кеңескен судьялар бұл талап-арызды қанағаттандырған жоқ. Сондықтан процесс осы ауданаралық сотта жалғаса береді. Ал процесс жүріп жатқан зал тарлық еткен соң, қаумалаған тілшілер мен өзге де азаматтар отырыс барысын көршілес бөлмеде орналасқан монитор арқылы бақылады. Айта кету керек, бүгінгі отырыста Бергей мен Аманжан Рысқалидің есімдері аталмады. Себебі, оларға қатысты қылмыстық іс бөлек қаралып жатыр. Қазір бұл екеуі және тағы 9 сыбайласы халықаралық іздеуде жүр.
-Облыстың бұрынғы әкімі мен оның сыбайластарына 71 миллиард теңге мемлекет қажысын қымқырды деген айып тағылып отыр. Қазіргі уақытта бұл соманың 24 миллиардқа жуығы қазынаға қайтарылса, қалған 42 миллиард теңгенің дүние-мүлік пен банктегі есепшоттарға тиым салынған. Жалпы, соңғы 1 жарым жыл бойы жүргізілген тергеу амалдары нәтижесінде қылмыстық іс 777 томға жеткен. Соған қарағанда, айыпталушыларға қатысты сот үкімінің жуық арада шыға қоюы екіталай.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
