Киллер Алтынбек Сәрсенбайұлын қалай өлтіргенін айтып берді
Алтынбек Сәрсенбайұлын өлтірген киллер тапсырысты Рахат Әлиев пен Әлнұр Мұсаевтан алғанын сотта растады. Сенат аппаратының бұрынғы жетекшісі Ержан Өтембаевқа қатысты қайта жанданған процесте бүгін осы Рустам Ибрагимовтан жауап алынды. Бұған дейін белгісіз болған жайттарды жайып салған жендет қылмысқа қалай дайындалып, қалай орындағанына дейін тізіп шықты. Ал Өтембаевтың өзі 2006 жылы Алтынбек Сәрсенбайұлын өлтіруге тапсырыс беруші ретінде 20 жылға түрмеге қамалған болатын.
Автор: Олжас Байжан
27.01.2014
-Сот процесінде бүгін Ержан Өтембаевқа жаңа айып тағылуы тиіс еді. Бірақ прокурорлар 2006 жылғы айыптау қорытындысын қайта оқып, қос тараптың наразылығын тудырды. Олар бұл процесте жаңа мәліметтер анықталғандықтан мемлекеттік айыптаушылардың да сөзі өзгеруі тиіс дегенді алға тартуда.
Сонымен қатар жәбірленуші жақ соттан алдымен қанды қылмысты ұйымдастырған Рустам Ибрагимовтан жауап алуды өтінді.
– Алдымен Ибрагимовты тыңдайық. Сосын қайта-қайта үзіліс жариялағанды доғары керек.
Осылайша сотты созбайық деген Сенат аппаратының бұрынғы жетекшісі бірден жауап беруге көшті. Айтуынша, Алтынбек Сәрсенбайұлын өлтіру жайлы ешқашан ойламапты. Тек ескі танысы Ибрагимовке сабап, сазайын бер деген. Бірақ 2006-шы жылы неге қылмысты мойнына алғанын сол күйі түсіндіре алған жоқ.
Ержан Өтембаев, сотталушы:
-Ол қиындықтар туындап жатыр деген соң бұл іспен айналысудың қажеті жоқ екендігін айттым. Ибрагимовке о баста мен Алтынбек Сәрсенбайұлының «көзін жою керек» деп айтқан емеспін. Тек әңгіме барысында «сазайын беру керек еді» дегенмін. Онда сөз арасында.
Ал киллердің өзін сот залына түстен кейін жеткізді. Өмір бойы бас бостандығынан айырылған 46 жасар Рустам Ибрагимовті мұздай қаруланған күзетшілердің жіті бақылауында. Жанынан бір қадам алыстаған жоқ. Осы киллердің жауабы өзгерген соң Алтынбек Сәрсенбайұлына қатысты процесс қайта жанданған болатын. Бүгін ол қоғам қайреткері мен көмекшілерін қалай өлтіргенін айтты.
Рустам Ибрагимов, сотталушы:
-Әлнұр Мұсаев телефон шалған кезде барлығы менімен бірге екенін айттым. Түгел өлтір дегенде не айтарымды білмедім. Сол кезде не сенікілер өледі, не олар өледі деді. Сондықтан Алтынбек Сәрсенбайұлын атып өлтірдім.
Ибрагимов сондай-ақ бұл іс бойынша барлық деректерді жайып салды. Тек бөлек ұялы телефон арқылы Әлнұр Мұсаевпен хабарласып, Сәрсенбайұлының мекен-жайы мен мінген көліктеріне дейін сипаттап берді. Қару-жарақ пен жүздерін жасыру үшін бас киім кигендері де белгілі болып отыр. Ал киллердің сөзін тыңдаған соң жәбірленуші жақ Өтембаевқа қатысты өзге шара қолдануды талап етті.
Рысбек Сәрсенбайұлы, А.Сәрсенбайұлының ағасы:
– Өтембаевқа қылмысты жасырғаны үшін қосымша айып тағылуы тиіс. Өйткені ол біле тұра хабарлап айтпаған. Не болмаса қылмыстың алдын алуға болады деп айтпаған. Қылмыстың жасалатындығын біле тұра. Оның да дәлелденуі керек.
-Сот бүгін тек Ержан Өтембаев пен Рустам Ибрагимовтің сөзін тыңдаса ертен тағы бес куәгерден жауап алынбақ. Олардың қатарында қылмыс жасалған күні көлік тізгінінде болған Виталий Мирошников да бар. Осылардың сөзінен соң осыған дейін сотталған азаматтарға тағайындалған жаза түрі өзгертілуі мүмкін.
Бізді Youtubе-та қараңыз! Бізді Facebook-та, Instagram-да, Telegram-да оқыңыз!
